Is-sajd: Il-Kummissjoni tipproponi l-opportunitajiet tas-sajd għall-2012 għall-istokkijiet tal-ħut tal-UE fl-Atlantiku u fil-Baħar tat-Tramuntana

Il-Kummissjoni Ewropea - Stqarrija għall-istampa

Is-sajd: Il-Kummissjoni tipproponi l-opportunitajiet tas-sajd għall-2012 għall-istokkijiet tal-ħut tal-UE fl-Atlantiku u fil-Baħar tat-Tramuntana

Brussell, is-27 ta’ Settembru 2011 – Illum il-Kummissjoni Ewropea ppreżentat l-ewwel proposta tagħha għall-opportunitajiet tas-sajd għall-2012 għal ċerti stokkijiet tal-ħut fl-Atlantiku u fil-Baħar tat-Tramuntana. Il-proposta tal-lum tistipula l-livelli tal-qabdiet totali permissibbli (it-TACs) u tal-isforz tas-sajd għall-istokkijiet tal-ħut immaniġġjati mill-UE biss, u mhux dawk għall-istokkijiet immaniġġjati flimkien ma’ pajjiżi terzi. Il-Kummissjoni qed tipproponi li żżid it-TACs għal 9 stokkijiet tal-ħut (għal ċerti stokkijiet tal-merluzz, il-petriċa, l-aringa, il-haddock, il-marlozz, il-lingwata, il-megrim u l-ksampu) u li tnaqqas it-TACs għal 53 stokk, abbażi tal-parir xjentifiku. Il-Kummissjoni qed tipproponi li ma jsir ebda sajd fl-2012 għall-merluzz fil-Punent tal-Iskozja, fil-Baħar Irlandiż u fil-Kattegat, minħabba l-istat ħażin ta’ dawn l-istokkijiet. Il-bidliet proposti għandhom jammontaw għal tnaqqis ġenerali fit-TACs (skont il-piż) ta’ 11 % meta mqabbel mal-2011. L-għan tal-Kummissjoni huwa li tistipula t-TACs f’livelli bbażati fuq il-parir xjentifiku li jgħinu fl-irkupru tal-istokkijiet u jwasslu sabiex is-sajd isir sostenibbli fit-tul.

Il-Kummissarju għall-Affarijiet Marittimi u s-Sajd, Maria Damanaki, qalet: “il-ġestjoni fit-tul tal-istokkijiet u dejta xjentifika affidabbli li fuqha nistgħu nibbażaw id-deċiżjonijiet tagħna huma l-pedamenti tal-proposta tagħna, f'konformità mar-riforma proposta tagħna tal-Politika Komuni tas-Sajd. Din ir-riforma se tirriżulta f’politika tas-sajd tajba għall-ġejjieni, abbażi ta’ stokkijiet vijabbli tal-ħut li se jiżguraw dħul diċenti għas-sajjieda.”

Il-limiti tal-qbid proposti huma bbażati fuq il-parir xjentifiku tal-Kunsill Internazzjonali għall-Esplorazzjoni tal-Baħar (l-ICES) u tal-Kumitat Xjentifiku, Tekniku u Ekonomiku għas-Sajd (STECF). Il-partijiet interessati wkoll ġew ikkonsultati f’Mejju abbażi tad-dokument ta’ Konsultazzjoni tal-Kummissjoni (IP/11/638).

L-għan aħħari tal-Kummissjoni huwa li l-istokkijiet kollha jiġu mistada f’livelli sostenibbli, fil-livell imsejjaħ ir-Rendiment Massimu Sostenibbli (MSY), sal-2015 – l-UE ħadet dan l-impenn mal-komunità internazzjonali, u dan l-impenn huwa wkoll pilastru prinċipali tar-riforma proposta tal-Politika Komuni tas-Sajd (il-PKS).

Sabiex l-MSY jintlaħaq sal-2015, il-Kunsill Internazzjonali għall-Esplorazzjoni tal-Baħar (l-ICES) beda jagħti l-parir xjentifiku tiegħu b'dan l-għan fi ħsiebu, kull meta dan kien possibbli. Barra minn hekk, qegħdin jiġu żviluppati pjanijiet ta’ ġestjoni multiannwali għall-istokkijiet kummerċjali l-kbar kollha. Hemm tendenza li l-istokkijiet li jiġu mmaniġġjati b’dan il-mod imorru aħjar minn dawk l-istokkijiet li jkunu suġġetti għat-teħid ta' deċiżjonijiet fuq żmien qasir.

Sfond

Din il-proposta tikkonċerna biss it-83 stokk li għalihom l-UE tiddeċiedi t-TACs tagħhom waħidha u se tiġi diskussa mill-Ministri tas-Sajd tal-Istati Membri fil-Kunsill tas-Sajd ta' Novembru.

Se jkun hemm proposta oħra li tittratta s-66 stokk li għalihom l-opportunitajiet tas-sajd iridu jiġu miftehma mal-Organizzazzjonijiet Reġjonali tal-Ġestjoni tas-Sajd (RFMOs) jew fil-kuntest ta' konsultazzjonijiet ma' pajjiżi terzi. Din se tiġi ppreżentata iktar tard din il-ħarifa. Permezz tal-qsim tal-proposta b’dan il-mod, is-sajjieda se jkunu jafu minn qabel kemm jistgħu jaqbdu ħut fl-2012 u b’hekk ikunu jistgħu jippjanaw aħjar is-sajd futur tagħhom.

L-approċċ fit-tul diġà wera li huwa ta' benefiċċju għal xi stokkijiet. Pereżempju, l-istokkjiet tal-petriċa fit-Tramuntana u fil-Majjistral ta’ Spanja jistgħu jilħqu livelli sostenibbli (MSY) diġà fl-2012, anke b'livelli ogħla ta' qbid (żieda ta' 110 % fit-TAC proposta), u t-TACs għall-merluzz fil-Baħar Ċeltiku u fil-Bajja ta' Biscay jistgħu jiżdiedu bla problemi b’141 %.

Però għad hemm tħassib serju dwar għadd ta’ stokkijiet. B’mod partikolari, minħabba l-istat ħażin tal-istokkijiet, il-Kummissjoni qed tipproponi li twaqqaf is-sajd għall-merluzz fil-Punent tal-Iskozja, fil-Baħar Irlandiż u fil-Kattegat. In-nuqqas ta’ dejta jfixkel il-ġestjoni ta’ dawn l-istokkijiet u minkejja li sar tnaqqis suċċessiv fit-TACs matul dawn l-aħħar snin, l-istokkijiet xorta ma rnexxilhomx jirkupraw.

Għall-istokkijiet fejn tant m’hemmx dejta li mhux possibbli li jiġi stmat id-daqs tagħhom b'mod xieraq, il-Kummissjoni applikat l-hekk imsejjaħ prinċipju ta' prekawzjoni u naqqset it-TACs b'bejn 15 % u 25 % sakemm tkun disponibbli dejta aktar affidabbli.

Fil-ħarifa se jinħareġ il-parir xjentifiku għal 12-il stokk u għalhekk, bħalissa, il-proposta ma fiha ebda ċifri għal dawn l-istokkijiet partikulari.

Il-Kummisjoni diġà pproponiet l-opportunitajiet tas-sajd għall-Baħar Baltiku għall-2012 fil-15 ta’ Settembru (IP/11/1033). Dawn il-proposti se jiġu diskussi mill-Ministri fil-Kunsill tas-Sajd ta’ Ottubru.

Għal aktar tagħrif:

Ara l-tabelli mehmużin għal detalji dwar il-proposti tal-lum għall-Atlantiku u l-Baħar tat-Tramuntana

It-TACs u l-kwoti: http://ec.europa.eu/fisheries/cfp/fishing_rules/tacs/index_mt.htm

Il-parir xjentifiku:

http://ec.europa.eu/fisheries/cfp/fishing_rules/scientific_advice/index_mt.htm

Il-pjanijiet ta’ ġestjoni multiannwali:

http://ec.europa.eu/fisheries/cfp/fishing_rules/multi_annual_plans/index_mt.htm

Tabella 1: L-istokkijiet li għalihom hemm proposti biex tiżdied it-TAC

Tabella 2: L-istokkijiet li għalihom hemm proposti biex titnaqqas it-TAC

Tabella 3: L-istokkijiet li huma suġġetti għal parir li se jingħata aktar tard

Tabella 4: L-istokkijiet li d-deċiżjonijiet dwar it-TACs tagħhom huma ddelegati lil Stati Membri individwali

Qari: Unitajiet tat-TAC

Ara wkoll il-mappa taż-żoni tas-sajd:

http://ec.europa.eu/fisheries/documentation/publications/cfp_factsheets/fishing_areas_mt.pdf