An Eoraip gan teorainn (an margadh aonair)

Deireadh le bacainní náisiúnta

Chun an margadh aontaithe seo a chruthú, rinneadh na céadta bacainn theicniúil, dhlíthiúil agus maorlathais a phlúch saorthrádáil agus saorghluaiseacht idir ballstáit an AE a dhíothú i sraith athchóirithe, a cuireadh i gcrích in 1993.

Dar leis an gCoimisiún, ghin na hathchóirithe seo 2.75 milliún post breise agus fás 1.85% idir 1992 agus 2009.

Agus iad saor chun dul i mbun gnó ar fud an bhloic gheilleagraigh iomláin, tá cuideachtaí tar éis a n-oibríochtaí a leathnú, agus tá an iomaíocht a d’eascair as ag laghdú praghsanna agus ag méadú rogha na dtomhaltóirí.

Ní chosnaíonn glaonna teileafóin san Eoraip ach beagán den mhéid a chosain siad 10 mbliana ó shin, tá go leor táillí aeriompair laghdaithe go mór agus tá bealaí nua oscailte. Tá go leor teaghlach agus gnóthas in ann an chuideachta a sholáthraíonn leictreachas agus gás dóibh a roghnú anois.

Ag an am céanna, oibríonn an AE lena áirithiú nach mbaineann na saoirsí níos mó seo an bonn ó chothromaíocht, ó chosaint tomhaltóirí ná ó inbhuanaitheacht chomhshaoil – agus cabhair aige ó údaráis éagsúla iomaíochta agus rialála na hEorpa.

Spreagadh don ghnó san Eoraip

I gcás gnólachtaí Eorpacha atá ag díol san AE, tá rochtain neamhshrianta ar bheagnach 500 milliún custaiméir acu – a thugann bonn láidir dóibh le fanacht iomaíoch i ngeilleagar an domhain. Gan trácht ar mhealltacht margaidh aontaithe chomh mór seo le haghaidh infheisteoirí eachtracha.

Agus féadfaidh comhtháthú geilleagrach a bheith luachmhar mar chosaint ar chúluithe eacnamaíochta tréimhsiúla, ag ligean do thíortha an AE leanúint ar aghaidh ag trádáil le chéile seachas dul i muinín beart caol cosantaí a dhéanfadh an ghéarchéim níos measa.

Is ann fós do roinnt bacainní

Tá tuilleadh le déanamh don chomhtháthú fós, áfach – is ann do go leor réimsí féidearthachta nach bhfuil tairbhe á baint astu.

Mar shampla, de bharr nádúr ilroinnte córais náisiúnta cánach tá moill ar chomhtháthú margaidh agus ar éifeachtúlacht.

Agus tá an earnáil seirbhísí tar éis éirí níos oscailte níos moille ná na margaí d’earraí, in ainneoin dlí thábhachtaigh nua in 2006 a chuireann ar chumas cuideachtaí réimse seirbhísí trasteorann a chur ar fáil óna mbunáit bhaile.

Bhí tionchar ag moilleanna ar sheirbhísí airgeadais agus ar iompar, i gcásanna ina bhfuil margaí náisiúnta aonair fós.

Maidir le seirbhísí airgeadais, tá iarracht á déanamh ag an AE macasamhail ghéarchéim 2009 a sheachaint trí earnáil airgeadais níos sábháilte agus níos treise a thógáil, trí bhearta lena n-áirítear maoirsiú ar institiúidí airgeadais, rialáil táirgí casta airgeadais agus ceanglas ar bhainc níos mó caipitil a bheith ina seilbh.

Saorghluaiseacht, ach rialuithe i bhfeidhm

Tá formhór na dtíortha san AE tar éis comhaontú a dhéanamh maidir le seiceálacha pas a bhaint ag a dteorainneacha le tíortha eile an AE, nuair atáthar ag taisteal ar talamh (ní mór do thaistealaithe aeriompair cruthúnas aitheantais a thaispeáint fós).

Is iad na heisceachtaí dó seo na 5 thír a choinnigh rialuithe teorann náisiúnta: an Chipir, Éire, an Ríocht Aontaithe, an Bhulgáir agus an Rómáin.

Mar sin féin, déantar é seo i gcomaoin rialuithe níos doichte ar theorainneacha seachtracha an AE – chun cosc a chur ar gach saghas coirpeach buntáiste a bhreith ar an gcóras, arna fhorlíonadh ag na nithe seo a leanas:

• córas de chuid an AE de chomhar póilíní agus ceartas coiriúil
• Europol , an fórsa póilíneachta Eorpach
• córas le haghaidh póilíní náisiúnta chun faisnéis a roinnt faoi aimhleastóirí a bhfuiltear sa tóir orthu nó aimhleastóirí a bhfuiltear in amhras fúthu.
• Eurojust – ionchúisitheoirí náisiúnta, póilíní agus dlíodóirí ar iasacht ag foireann lárnach atá ag comhrac i gcoinne na coireachta eagraithe.

Barr

Institiúidí agus comhlachtaí an AE

• An Coimisiún Eorpach
  • Roinn an mhargaidh aonair
• Parlaimint na hEorpa
  • An Coiste um an Margadh Inmheánach agus um Chosaint an Tomhaltóra
• Comhairle an Aontais Eorpaigh
  • Iomaíochas: margadh inmheánach, tionscal agus taighde
• Coiste Eacnamaíoch agus Sóisialta na hEorpa
  • An margadh aonair, táirgeadh agus tomhaltas
• Coiste na Réigiún
  • An Coimisiún um an mBeartas Eacnamaíoch agus Sóisialta (ECOS)
• Gníomhaireachtaí an AE
  • An Oifig um Chomhchuibhiú sa Mhargadh Inmheánach (trádmharcanna agus dearaí)
  • An tÚdarás Eorpach Baincéireachta (EBA)
  • An tÚdarás Eorpach Urrús agus Margaí (ESMA)

Deiseanna ar mhaoiniú

• Deontais
• Glaoch ar thairiscintí (soláthar poiblí)

Foilseacháin, nuachtlitreacha agus staitisticí

• Foilseacháin
• Nuachtlitreacha
• Staitisticí

Reachtaíocht

• Achoimrí ar reachtaíocht an AE i réimse an mhargaidh inmheánaigh
• Reachtaíocht atá i bhfeidhm i réimse an mhargaidh inmheánaigh: An margadh aonair / Saorghluaiseacht daoine / Conarthaí poiblí
• Conradh ar Fheidhmiú an Aontais Eorpaigh - Airteagail 14, 26 - 29, 45 – 66, 114, 115, 118