Multilingwiżmu

Ħarsa ġenerali tal-politiki tal-UE fil-qasam tal-lingwi

Apparti 23 lingwa uffiċjali tal-UE, fl-Ewropa mitkellma ħafna lingwi reġjonali u minoritarji. L-UE tipprova minn kollox biex tipproteġi din id-diversità lingwistika u biex tippromwovi t-tagħlim tal-lingwi.

Aqra t-test sħiħAqra t-test sħiħ

Lingwi uffiċjali

Attwalment hemm 23 ilsien uffiċjali fl-UE.

Il-lingwi uffiċjali attwali tal-UE huma: il-Bulgaru, iċ-Ċek, id-Daniż, l-Olandiż, l-Ingliż, l-Estonjan, il-Finlandiż, il-Franċiż, il-Ġermaniż, il-Grieg, l-Irlandiż, it-Taljan, l-Isvediż, il-Latvjan, il-Litwan, il-Malti, il-Pollakk, il-Portugiż, ir-Rumen, is-Slovakk, is-Sloven, l-Ispanjol u l-Ungeriż.

Isma' silta żgħira mil-lingwi uffiċjali tal-UE

Iċ-ċittadini għandhom id-dritt li jibagħtu dokumenti lill-istituzzjonijiet tal-UE fi kwalunkwe minn dawn il-lingwi, u li jirċievu tweġiba bl-istess lingwa. Ir-regolamenti kollha tal-UE u dokumenti leġiżlattivi oħra huma ppubblikati wkoll f'kull waħda minn dawn il-lingwi.

Fil-Parlament Ewropew, ir-rappreżentanti eletti min-nies għandhom ukoll id-dritt li jitkellmu fi kwalunkwe waħda mil-lingwi uffiċjali tal-UE.

Lingwi użati fis-sit EUROPA

L-ammont kbir ta' informazzjoni fuq l-internet dwar l-UE u l-attivitajiet tagħha ma tistax tingħata f'kull lingwa uffiċjali. L-UE toffri, fil-lingwi kollha, informazzjoni essenzjali dwar il-politiki, u d-dokumenti tagħha relatati mal-opportunitajiet ta' finanzjament. Kontenut ieħor jingħata bil-lingwi l-aktar mitkellma fl-UE.

Lingwi reġjonali jew minoritarji

L-UE jinsabu fiha aktar minn 60 lingwa indiġeni reġjonali jew lingwi minoritarji, mitkellma minn madwar 40 miljun persuna. Dawn jinkludu l-Katalan, il-Bask, il-Frisjan, is-Saami, iċ-Ċeltiku u l-Yiddish.

Il-politika tal-UE hi li jiġu protetti u promossi l-lingwi minoritarji u għadd ta' inizjattivi kienu ffinanzjati b'dan l-għan.

Tagħlim tal-lingwi

Ħafna dizzjunarji multilingwi fuq xkaffa © iStockphoto

Huwa tajjeb ħafna li nrawmu lit-tfal ta' età żgħira b'lingwi ġodda.

L-għan hu li kull persuna fl-UE tkun taf titkellem b'żewġ lingwi minbarra lsien pajjiżha. Biex jintlaħaq dan l-għan, l-UE hi favur li t-tfal jitgħallmu żewġ lingwi barranin minn età bikrija. L-evidenza tissuġġerixxi li dan jista' jirriżulta f'tagħlim tal-lingwi aktar malajr u f'kapaċitajiet aktar avvanzati fil-lingwa materna.

L-UE tipprovdi appoġġ għat-tagħlim tal-lingwi minħabba li:

tista' tgħin fil-bini ta' komunitajiet bejn l-individwi u n-nazzjonijiet, u minħabba li hu essenzjali li ngħixu flimkien f'Ewropa multilingwi u multikulturali
in-negozji jinħtiġilhom staff multilingwi biex ikunu jistgħu joperaw b'mod effettiv fl-Ewropa kollha
l-industrija tal-lingwi – it-traduzzjoni u l-interpretazzjoni, it-tagħlim tal-lingwi, it-teknoloġija lingwistika eċċ. – hu wieħed mill-oqsma li qed jikbru b'rata mgħaġġla fl-ekonomija.

Fl-2006 stħarriġ sab li 28% tar-respondenti kienu diġà qed jiddikjaraw li jafu jitkellmu b'żewġ lingwi barranin, u 56% kienu jafu jitkellmu b'lingwa barranija waħda. Minorità żgħira biss ta' Ewropej jikkunsidraw li t-tagħlim tal-lingwi ma għandu ebda importanza – 8% biss fl-2006.