You are here:

Affarijiet Marittimi u Sajd

L-għajxien ta' bosta ċittadini tal-UE jiddependi fuq il-baħar u r-riżorsi li joffri - il-ħut ovvjament, iżda wkoll l-enerġija minn parks eoliċi u minn bjar taż-żejt u l-gass 'il barra mix-xtut. Il-flotta merkantili tal-UE tiddependi fuq l-oċeani tad-dinja għall-kummerċ. Iż-żoni kostali huma kalamita għat-turisti - sors ieħor ta' għajxien.

B'dawn l-interessi kollha involuti jeħtieġ inkunu responsabbli fl-użu li nagħmlu mir-riżorsi tal-ibħra, nevitaw is-sajd żejjed u niżguraw li l-estrazzjoni taż-żejt u l-gass ma tagħmilx ħsara lill-ambjent marittimu jew kostali.

Sajd – l-importanza tal-konservazzjoni

L-industrija tas-sajd tal-UE hi r-raba' l-akbar waħda fid-dinja, hi tipprovdi madwar 6.4 tunnellati ta' ħut fis-sena. Is-sajd u l-ipproċessar tal-ħut jipprovdu impjiegi għal aktar minn 350,000 persuna.

L-UE tagħmel l-isforzi kollha biex tiżgura li s-sajd ikun sostenibbli - kemm ekonomikament kif ukoll ambjentalment - filwaqt li tipproteġi l-interessi tal-konsumaturi u tikkunsidra l-ħtiġijiet tas-sajjieda.

Ir-riforma tal-politika komuni tas-sajd tal-UE li saret f'Jannar 2014 għandha preċiżament dawn l-għanijiet: li tiżgura l-għajxien tas-sajjieda, filwaqt li twaqqaf is-sajd żejjed u t-tnaqqis konsegwenti fl-istokkijiet.

Il-liġi l-ġdida hi bbażata fuq Fond Ewropew għall-Affarijiet Marittimi u s-Sajd. Bejn l-2014 u l-2020, dan se jiffinanzja proġetti mfassla biex

  • jintroduċu tekniki tas-sajd innovattivi
  • joħolqu opportunitajiet ġodda għall-frott tal-baħar
  • itejbu l-kwalità tal-ħajja fiż-żoni kostali.

Dan se jgħin lis-sajjieda biex jimxu lejn sajd sostenibbli, u l-komunitajiet kostali biex jiddiversifikaw l-ekonomiji tagħhom.

Kooperazzjoni internazzjonali

L-UE taħdem ma' korpi tan-NU fi ħdan organizzazzjonijiet tas-sajd reġjonali u internazzjonali biex tiżgura li l-ibħra kullimkien ikunu regolati b'mod trasparenti, sostenibbli u li ma jsirx sajd żejjed fihom.

Ftehimiet bilaterali ma’ pajjiżi mhux membri tal-UE jagħtu aċċess lis-sajjieda tal-UE biex jistadu f’ibħra mbiegħda, taħt l-istess kundizzjonijiet li japplikaw fl-UE. Dan jgħin biex is-suq tal-UE jinżamm fornit. Bi tpattija, il-pajjiżi msieħba (inklużi l-pajjiżi li qed jiżviluppaw) jirċievu kontribuzzjoni finanzjarja li jistgħu jinvestuha fl-iżvilupp tal-industrija tas-sajd tagħhom u biex jibnu l-istokkijiet tal-ħut tagħhom stess.

It-trobbija tal-ħut u tal-frott tal-baħar – b'mod sostenibbli

Teżisti differenza li qed tikber bejn l-ammont ta' frott tal-baħar mikul fl-UE u l-volum ipprovdut mill-industrija tas-sajd. L-akkwakultura tista' tagħmel tajjeb għal dan sa ċertu punt. Illum, kwart tal-ħut u tal-frott tal-baħar prodott fl-UE diġà jiġi minn farms tal-ħut u forom oħrajn ta' akkwakultura. Il-maskli, it-trota qawsalla u s-salamun tal-Atlantiku huma l-ispeċijiet ewlenin imrobbija fl-UE bil-volum, u wara jiġu l-gajdri, l-awrat, il-karpjun, il-gandoffli u l-ispnott.

L-akkwakultura Ewropea għandha standards eċċezzjonalment għoljin ta' protezzjoni tal-ambjent, is-saħħa tal-annimali u s-sikurezza tal-konsumaturi. Madankollu, is-settur staġna fis-snin reċenti. Il-leġiżlazzjoni l-ġdida hija mfassla biex treġġa' lura din ix-xejra u tingħata spinta lill-provvista ta’ ħut frisk, tajjeb għas-saħħa u prodott lokalment.

Sajd illegali

Is-sajd illegali, mhux rapportat u mhux regolat ifaqqar l-istokkijiet tal-ħut, jeqred il-ħabitats tal-baħar, ifixkel il-kompetizzjoni, iqiegħed lis-sajjieda onesti fi żvantaġġ inġust, u jdgħajjef il-komunitajiet kostali, speċjalment fil-pajjiżi li qed jiżviluppaw.

L-UE qed taħdem biex telimina d-dgħjufijiet li jippermettu lill-operaturi illegali jiksbu profitt mill-attivitajiet tagħhom. Il-prodotti tas-sajd tal-baħar iċċertifikati bħala legali mill-Istat tal-bandiera jew mill-istat li jesporta biss jistgħu jiġu nnegozjati ġewwa u barra l-UE. U kwalunkwe operaturi tal-UE li jistadu illegalment ikun fejn ikun fid-dinja, taħt kwalunkwe bandiera, jirriskjaw penali sostanzjali fi proporzjon mal-valur ekonomiku tal-qabdiet tagħhom, bil-konsegwenza li jitilfu kwalunkwe profitt li setgħu għamlu.

Il-konsum sostenibbli tal-ħut

Is-sostenibbiltà hija wkoll dwar kif nikkunsmaw il-frott tal-baħar – għalhekk l-UE u l-gvernijiet Ewropej jaħdmu ħafna biex iżommu lill-konsumaturi konxji ta’ din il-kwistjoni.

U filwaqt li l-konsumaturi għandhom setgħa kbira bl-għażliet tax-xiri tagħhom, huwa importanti li l-isforzi tagħhom jikkorrispondu għall-komponenti l-oħra kollha fil-katina tal-provvista.

Pereżempju, skont ir-regoli ġodda ta' tikkettar għall-ħut, il-molluski, il-krostaċji u l-alga, il-prodotti kollha mibjugħa lill-konsumaturi jew lill-fornituri tal-ikel tal-massa tal-UE għandhom jinkludu l-informazzjoni li ġejja:

  • l-isem kummerċjali u xjentifiku tal-ispeċijiet
  • jekk il-prodott inqabadx fil-baħar jew fl-ilma ħelu, jew jekk ġiex imrobbi
  • iż-żona fejn inqabad jew tal-produzzjoni u t-tip ta’ rkaptu tas-sajd użat
  • jekk il-prodott kienx iddifrostjat u d-data ‘uża qabel’ jew id-data ‘uża sa’, f’konformità mar-regoli ġenerali dwar it-tikkettar tal-ikel.

Benefiċċji ekonomiċi

L-ibħra u l-oċeani huma muturi ewlenin fl-ekonomija Ewropea. L-UE għandha l-akbar numru ta’ portijiet kummerċjali (1,200) u l-akbar flotta merkantili. 90% tal-kummerċ ma' pajjiżi mhux fl-UE u 40% tal-kummerċ fl-UE ġej mill-baħar. Dan is-settur jirrappreżenta madwar 5.4 miljun impjieg u jiġġenera valur miżjud gross ta’ kważi €500 biljun kull sena.

Madankollu għad hemm potenzjal vast li għadu ma ġiex sfruttat għall-innovazzjoni u t-tkabbir, speċjalment f’ċerti oqsma. Bħala riżultat, fis-snin reċenti l-UE wessgħet l-ambitu tal-politka marittima tagħha biex tkopri l-użi kollha tal-ispazju marittimu.

Il-miri f'terminu twil huma stabbiliti fl-istrateġija Tkabbir Blu, inkluż:

  • l-iżvilupp ta' setturi b'potenzjal kbir, bħall-akkwakultura, it-turiżmu kostali, il-bijoteknoloġija marittima, l-enerġija mill-oċeani u l-isfruttament ta’ qiegħ il-baħar.
  • l-għarfien, iċ-ċertezza u s-sigurtà ġuridika permezz ta' mappa diġitali ta' qiegħ il-baħar tal-Ewropa, l-ippjanar spazjali marittimu (biex l-attivitajiet marittimi jsiru aktar effiċjenti u sostenibbli) u s-sorveljanza marittima integrata (biex l-awtoritajiet involuti fis-sorveljanza marittima jingħataw għodod ġodda biex jaqsmu l-informazzjoni, u b'hekk is-sorveljanza tqum inqas flus u tkun aktar effettiva).
  • strateġiji mfasslin apposta għal ibħra partikolari (l-Ibħra tal-Adrijatiku u tal-Jonju, l-Oċean Arktiku, l-Oċean Atlantiku, il-Baħar Baltiku, il-Baħar tal-Mediterran, il-Baħar tat-Tramuntana) li jippromwovu wkoll kooperazzjoni bejn il-pajjiżi li jinsabu mal-fruntiera.

Biex jiżdied l-għarfien dwar l-importanza kruċjali ta' ibħra u oċejani f’qagħda tajba għal ħajjitna, l-UE tiċċelebra l- Agħżel it-traduzzjonijiet mil-link ta' qabel   English (en) Jum Marittimu Ewropew fl-20 ta' Mejju kull sena.