Forbairt agus comhar

Infheistíocht sa todhchaí

In 2011, €53 billiún ar an iomlán a thug an AE i gcúnamh forbraíochta – sin cúnamh ó chistí an AE agus ó bhuiséid náisiúnta na mBallstát le chéile.

Sin 0.42% den ollioncam náisiúnta (OIN) sna Ballstáit uile le chéile, rud a chiallaíonn gurb é an AE an deontóir is mó cabhrach ar domhan. Beidh comhiarracht de dhíth fós leis an sprioc a shocraigh an Chomhairle Eorpach a bhaint amach – 0.7% den OIN faoi 2015.

An bhochtaineacht a dhíothú don mhílaois nua

Is é an príomhchuspóir le beartas forbraíochta an AE an bhochtaineacht a dhíothú trí chur chuige inbhuanaithe a úsáid. Tá tábhacht thar cuimse don chuspóir sin le hocht Sprioc Forbartha Mílaoise na Náisiún Aontaithe a ghlac ceannairí an domhain in 2000 mar spriocanna don bhliain 2015. I measc na spriocanna sin tá an fhíorbhochtaineacht a laghdú faoina leath, scaipeadh VEID/SEIF a stopadh, agus bunoideachas a chur ar fáil do chách.

Ó 1990 tháinig laghdú 600 milliún ar líon na ndaoine atá ag maireachtáil i bhfíorbhochtaineacht ach níor tharla an dul chun cinn céanna i dtreo roinnt de na spriocanna eile. I measc roinnt de na spriocanna is deacra a bheidh le baint amach faoi 2015 tá líon na leanaí agus na máithreacha a fhaigheann bás i mbreith clainne a laghdú agus uisce glan óil a chur ar fáil. Mar chúnamh chuige sin, gheall an AE in 2011 go gcuirfí €1 billiún breise ar fáil do na Spriocanna Forbartha Mílaoise is lú dul chun cinn in 79 tír san Afraic, i Muir Chairib agus san Aigéan Ciúin.

Beidh an Coimisinéir Eorpach um Fhorbairt, Andris Piebalgs, ag déanamh scrúdú ar thodhchaí an chláir oibre dhomhanda maidir le forbairt tar éis 2015 mar chuid de ghrúpa ardleibhéil sna Náisiúin Aontaithe faoi stiúir Ard-Rúnaí na Náisiún Aontaithe, Ban Ki-moon.

• An AE agus Spriocanna Forbartha na Mílaoise

Clár Oibre don Athrú

Is é 'an Clár Oibre don Athrú ' an treoirphlean nua do bheartas forbraíochta an AE agus ghlac airí an AE leis an treoirphlean sin in 2012. Leagann sé síos cur chuige nua i leith an bheartais forbraíochta, cur chuige a thugann aird ar dhomhan atá ag athrú, ar na deontóirí nua atá ag teacht chun cinn, agus ar na dúshláin nua atá ann do stáit i mbéal forbartha.

Is é is aidhm don bheartas nua cúnamh níos straitéisí, níos spriocdhírithe agus níos dírithe ar thorthaí a chur ar fáil faoi dhá phríomhshraith:

• cearta an duine, an daonlathas agus dea-rialachas a chur chun cinn agus
• fás cuimsitheach agus inbhuanaithe – le go mbeidh sé ar chumas daoine an bhochtaineacht ina bhfuil siad féin a dhíothú.

Tugann an Clár Oibre don Athrú aghaidh ar an gcúnamh forbraíochta i dtrí réimse:

• cosaint shóisialta, sláinte, oideachas agus fostaíocht
• an timpeallacht ghnó, trádáil agus na margaí domhanda
• talmhaíocht inbhuanaithe agus fuinneamh.

Tugann sé aghaidh freisin ar úsáid éifeachtach an chúnaimh a fheabhsú agus ar shlite nuálacha a úsáid le maoiniú a thabhairt – meascán d'iasacht agus de dheontas – agus féachann sé chuige go mbeidh beartais uile an AE, m.sh. an t-athrú aeráide, talmhaíocht nó trádáil, ag luí le spriocanna forbartha an AE.

Tacaíocht a thabhairt do thíortha agus do dhaoine aonair an bhochtaineacht ina bhfuil siad a dhíothú

Thar na blianta, thug an AE tacaíocht do a lán tíortha agus iad ag iarraidh an bhochtaineacht a dhíothú agus todhchaí níos fearr a chruthú dá bpobail. Is iarracht fhadtéarmach a bhíonn i gceist go minic. Seo roinnt den dul chun cinn atá déanta:

• cuireadh feabhas ar ioncam, sláinte agus mianach saoil oibrithe bochta i ndeisceart na hIndia a bhíonn ag soláthar don tionscal teicstíle
• cuireadh oiliúint i bhfiontraíocht, i mbainistíocht ghnó agus in airgeadas gnó ar dhaoine óga sa Bhrasaíl
• rinneadh nuálaíocht san eolaíocht le beostoic a chosaint ar an gcuil seitse sa Chéinia
• tugadh tacaíocht do chlár oideachais agus oiliúna sa tSuasalainn.

Cás-staidéir forbraíochta an AE

An chumhacht a thabhairt do dhaoine a gcinniúint féin a chinneadh

Tá beartas forbraíochta an AE dírithe ar dhaoine faoi mhíbhuntáiste i dtíortha i mbéal forbartha a chumasú lena bhforbairt féin a chinneadh. Is é a chiallaíonn sé sin:

• dul i ngleic leis na cúiseanna leochaileachta – mar shampla drochfháil ar bhia, uisce glan, oideachas, sláinte, fostaíocht, talamh, seirbhísí sóisialta, bonneagar agus timpeallacht fholláin
• galair a dhíothú agus rochtain ar chógais neamhchostasacha a chur ar fáil mar chosaint ar eipidéimí ar nós VEID/SEIF
• an t-ualach fiachais a laghdú do thíortha i mbéal forbartha, le go mbeidh níos mó airgid acu d'infheistíochtaí poiblí tábhachtacha, in ionad ús a íoc le hiasachtóirí saibhre i dtíortha tionsclaithe
• straitéisí féinchabhrach agus díothaithe bochtaineachta a chur chun cinn; tacaíocht a thabhairt don phróiseas daonlathach; an meas ar chearta an duine, comhionannas idir fir agus mná san áireamh, a threisiú; agus timpeallacht eacnamaíoch níos buanseasmhaí a spreagadh ina mbeidh gnólachtaí in ann fás agus poist a chruthú.

Barr

Institiúidí agus comhlachtaí an AE

• An Coimisiún Eorpach
  • Forbairt agus comhar - EuropeAid
  • An tSeirbhís Eorpach Gníomhaíochta Seachtraí
• Parlaimint na hEorpa
  • An Coiste um Fhorbairt
  • Comhthionól Parlaiminteach ACC-AE
• Comhairle an Aontais Eorpaigh
  • Gnóthaí eachtracha
• An Coiste Eacnamaíoch agus Sóisialta
  • Caidreamh seachtrach
• Coiste na Réigiún
  • An Coimisiún um Shaoránacht, Rialachas, Gnóthaí Institiúideacha agus Caidreamh Seachtrach (CIVEX)
• An Banc Eorpach Infheistíochta
  • Idirghabhálaithe airgeadais lasmuigh den AE

Deiseanna ar mhaoiniú

• Deontais agus cuirí chun tairisceana (soláthar poiblí)

Foilseacháin, nuachtlitreacha agus staitisticí

• Foilseacháin
• Nuachtlitreacha
• Staitisticí

Reachtaíocht

• Achoimrí ar reachtaíocht an AE i réimse na forbartha agus an chomhair (téacs iomlán)
• Reachtaíocht atá i bhfeidhm i réimse na forbartha agus an chomhair
• An Conradh ar Fheidhmiú an Aontais Eorpaigh - Airteagail 208 - 213 (comhar um fhorbairt)