Closamharc agus na Meáin

Caighdeáin arda agus rogha leathan

Is ag leibhéal náisiúnta a chuireann rialtais aonair beartas closamhairc le chéile, agus tá leasanna tráchtála móra agus saincheisteanna casta maidir le héagsúlacht chultúrtha, seirbhís phoiblí agus freagracht shóisialta i gceist leis. Is é an ról atá ag an AE ná roinnt bunrialacha agus treoirlínte a leagan síos chun comhleasanna a chosaint, mar shampla margaí oscailte an AE agus iomaíocht chothrom.

Léigh an téacs iomlánLéigh an téacs iomlán

Seirbhísí ar éileamh agus seirbhísí teilifíse

Tá craoltóireacht teilifíse trasteorann á rialú go rathúil ag an AE ó 1989 i leith. Ó shin i leith, bhí air nuashonrú a dhéanamh ar na rialacha chun an réimse leathan seirbhísí teilifíse atá ar fáil a chur san áireamh - lena n-áirítear teilifís ar éileamh - trí réimse leathan fearas, amhail fóin phóca agus táibléid (féach An Treoir maidir le Seirbhísí Meán Closamhairc).

Leanbh ag breathnú ar an teilifís © Shutterstock

Tugtar cosaint do leanaí ó ábhar díobhálach le rialacha an AE.

Leis an Treoir, ceanglaítear ar thíortha an AE reachtaíocht náisiúnta a chomhordú lena chéile ionas:

gur féidir cláir teilifíse agus seirbhísí físeáin ar éileamh a thrádáil gan bac ar mhargadh an AE
go gcoinneoidh cainéil teilifíse, nuair is féidir, ar a laghad leath dá dtréimhse chraolacháin do scannáin agus cláir atá déanta san Eoraip; ba cheart saothair Eorpacha a chur chun cinn freisin sna seirbhísí ar éileamh
go gcosnófar éagsúlacht chultúrtha agus cuspóirí tábhachtacha eile atá ar mhaithe le leas an phobail
go mbeidh mór-imeachtaí - amhail na Cluichí Oilimpeacha nó an Corn Domhanda Sacair - ar fáil do lucht féachana leathan, ní díreach ar chainéil teilifíse nach mór íoc orthu
go gcosnaítear leanaí agus daoine óga ó chláir fhoréigneacha nó pornagrafacha trí iad a chur ar siúl deireanach san oíche agus/nó trí rochtain orthu a theorannú le gaireas atá mar chuid de shás láimhe rialaithe na teilifíse
go bhfuil sé de cheart ag páirtithe ar a ndéantar caitheamh anuas éagothrom i gcraolachán teilifíse freagra a thabhairt
go léiríonn gach seirbhís meán closamhairc bunrialacha áirithe maidir le fógraíocht (meas ar dhínit an duine, srianta maidir le halcól, tobac & cógas, etc.)
nach bhfuil níos mó ná 12 nóiméad fógraíochta in aghaidh an uair a chloig ar chainéil (an t-uasmhéid a údaraítear).

Tacaíonn an AE le lucht déanta scannán Eorpacha.

Craoltóireacht Phoiblí

Tá ballstáit an AE tiomanta do sheirbhísí craoltóireachta poiblí - aithníonn Conradh Amstardam 1999 an ról atá acu soláthar a dhéanamh do riachtanais dhaonlathacha, shóisialta agus chultúrtha agus an tionscal a chosaint ó fhorlámhas pháirtí amháin níos níos mó.

Féadfaidh rialtais tacaíocht airgeadais a chur ar fáil do chraoltóirí poiblí, ar an gcoinníoll go mbaintear úsáid as an gcistiú chun tabhairt faoi aidhm na seirbhíse poiblí agus ar an gcoinníoll nach gcuireann sé bac ar ghnáth-oibríochtaí tráchtála agus nach gcuireann sé isteach ar iomaíocht idir chraoltóirí.

Inneachar Eorpach (eisceacht chultúrtha)

Is é An Treoir maidir le Seirbhísí Meán Closamhairc a cheanglaíonn ar chraoltóirí íoschuóta de chláir Eorpacha a thaispeáint, ag léiriú imní gur léiriúcháin ó Mheiriceá is mó a bheidh sa mhargadh Eorpach mura ndéantar amhlaidh. Cé go ndéantar níos mó scannán i dtíortha Eorpacha ná mar a dhéantar i Meiriceá, tagann 75% d’ioncam pictiúrlanna Eorpacha ó scannáin Meiriceánacha.

Tá an AE ina bhall de Choinbhinsiún UNESCO ar Éagsúlacht Léirithe Cultúir a Chosaint agus a Chur chun Cinn agus, mar shlí amháin chun a éagsúlacht chultúrtha féin a chosaint agus léiriúcháin áitiúla a chur chun cinn, tá díolúine bainte amach aige ó rialacha saorthrádála na hEagraíochta Domhanda Trádála. Tugtar an ‘eisceacht chultúrtha’ air sin, agus ciallaíonn sé go bhfuil na ballstáit i dteideal teorainneacha a chur ar allmhairí míreanna cultúrtha amhail scannáin.

MEDIA 2007-2013

Cuireann an clár MEDIA tacaíocht airgeadais ar fáil do scannáin agus do chláir teilifíse Eorpacha d’ardchaighdeán. Is iad na haidhmeanna atá ann ná aschur agus dáileadh a mhéadú san Eoraip agus scannáin Eorpacha, oibreacha closamhairc eile agus teicneolaíochtaí digiteacha nua a chur chun cinn.

Tá an clár MEDIA Mundus nua (2011-2013), ag a bhfuil buiséad €15 milliún ag baint leasa as an tsuim bhreise atá ag an tionscal closamhairc i gcomhar domhanda agus na deiseanna a gcuirtear ar fáil leis. Méadaítear rogha na dtomhaltóirí trí níos mó táirgí le héagsúlacht chultúrtha a chur ar fáil ar an margadh Eorpach agus ar mhargaí idirnáisiúnta. Cruthaítear deiseanna gnó nua do ghairmithe closamhairc ón Eoraip agus ó áiteanna ar fud an domhain freisin.