Trealamh brú iniompartha
ACHOIMRE AR:
Treoir 2010/35/AE maidir le trealamh brú iniompartha
CAD IS AIDHM LEIS AN TREOIR?
- Leagtar amach leis rialacha mionsonraithe maidir le trealamh brú iniompartha*, chun sábháilteacht a fheabhsú agus chun saorghluaiseacht trealaimh den sórt sin a áirithiú laistigh de AE.
- Nuashonraítear leis reachtaíocht roimhe seo, go háirithe maidir le ceanglais chomhréireachta, measúnuithe comhréireachta, cigireachtaí tréimhsiúla agus seiceálacha maidir le trealamh brú iniompartha agus aisghairtear leis Treoir 76/767/CEE, Treoir 84/525/CEE, Treoir 84/526/CEE, Treoir 84/527/CEE agus Treoir 1999/36/CE ón gComhairle.
PRÍOMHPHOINTÍ
Raon feidhme
Tá feidhm ag an treoir seo maidir le:
- trealamh brú iniompartha nua nach bhfuil na marcálacha comhréireachta air dá bhforáiltear i dTreoir 84/525/CEE, i dTreoir 84/526/CEE, i dTreoir 84/527/CEE ná i dTreoir 1999/36/CE, chun é a chur ar fáil ar an margadh;
- trealamh brú iniompartha ar a bhfuil na marcálacha comhréireachta dá bhforáiltear sna treoracha thuas, chun críocha a iniúchtaí tréimhsiúla, a chigireachtaí idirmheánacha, a sheiceálacha eisceachtúla agus a úsáid eisceachtúil;
- trealamh brú iniompartha nach bhfuil na marcálacha comhréireachta air dá bhforáiltear i dTreoir 1999/36/CE, chun críocha athmheasúnú comhréireachta.
Níl feidhm ag an treoir maidir le:
- trealamh brú iniompartha a chuirtear ar an margadh roimh dháta chur chun feidhme Threoir 1999/36/CE agus nár cuireadh faoi athmheasúnú comhréireachta;
- trealamh brú iniompartha a úsáidtear go heisiach chun earraí contúirteacha a iompar idir tíortha AE agus tíortha neamh-AE, a rinneadh i gcomhréir le Treoir 2008/68/CE (féach an achoimre ar Iompar intíre earraí contúirteacha).
Oibleagáidí monaróirí, allmhaireoirí agus dáileoirí
- Ní mór do mhonaróirí a áirithiú agus a dtrealamh brú iniompartha á chur ar an margadh acu, go bhfuil an trealamh deartha, monaraithe agus doiciméadaithe i gcomhréir leis na ceanglais sa treoir seo agus i dTreoir 2008/68/CE araon. A luaithe agus a léirítear an comhlíonadh tríd an bpróiseas measúnaithe comhréireachta, ní mór do mhonaróirí an comhartha Pi* a ghreamú den trealamh. Ní mór don mhonaróir é féin amháin an comhartha Pi sin a ghreamú nó, i gcásanna athmheasúnaithe comhréireachta, nó mór don chomhlachta dá dtugtar fógra é a ghreamú nó ní mór é a ghreamú faoi fhaireachas an chomhlachta dá dtugtar fógra*.
- Má chreideann monaróirí gur chuir siad trealamh brú iniompartha ar an margadh nach gcomhlíonann na ceanglais, ní mór dóibh na bearta ceartaitheacha is gá a ghlacadh láithreach bonn chun na ceanglais a chomhlíonadh agus, nuair is cuí, an trealamh a tharraingt siar nó aisghairm ón margadh. Má iarrann an t–údarás inniúil náisiúnta é, ní mór do mhonaróirí na doiciméid go léir a sholáthar chun comhréireacht a dtrealaimh a chruthú, i dteanga a thuigfidh an t–údarás go héasca.
- Féadfaidh monaróirí, trí shainordú i scríbhinn, ionadaí údaraithe a cheapadh. Sonrófar sa sainordú cúraimí faoina dtabharfaidh an t–ionadaí údaraithe, ach áireofar orthu sin:
- an doiciméadacht theicniúil a choimeád atá ar fáil d’údaráis náisiúnta faireachais;
- gach faisnéis agus doiciméadacht riachtanach a sholáthar don údarás inniúil náisiúnta, arna iarraidh sin dó, chun comhréireacht an trealaimh bhrú iniompartha a chruthú;
- comhoibriú leis na húdaráis inniúla náisiúnta maidir le gníomhaíocht a rinneadh chun deireadh a chur le haon rioscaí a bhaineann leis an trealamh atá cumhdaithe sa sainordú.
- Ní fhéadfaidh allmhaireoirí agus dáileoirí ach trealamh brú iniompartha a chomhlíonann Treoir 2008/68/CE agus Treoir 2010/35/AE a chur ar an margadh AE. Ní mór dóibh a áirithiú go bhfuil an comhartha Pi ar an trealamh agus go bhfuil an deimhniú comhréireachta riachtanach leis. I gcás nach gcreideann allmhaireoirí nó dáileoirí go bhfuil an trealamh comhréireach, ní foláir nach gcuirfidh siad ar an margadh é.
- Ní mór d’allmhaireoirí, dáileoirí agus úinéirí:
- an monaróir agus an t–údarás inniúil a chur ar an eolas faoi aon riosca a bhaineann leis an trealamh. Nó, más ábhartha, is féidir leis an dáileoir an t–allmhaireoir a chur ar an eolas agus is féidir leis an úinéir an riosca sin a chur in iúl don dáileoir nó don allmhaireoir;
- gach cás neamhchomhlíonta agus bearta ceartaitheacha a dhoiciméadú;
- a áirithiú, nuair a bhíonn trealamh brú iniompartha faoina gcúram, nach gcuirfidh dálaí stórála nó iompair a chomhréireacht i mbaol.
- Ní bhaineann an méid thuas le daoine príobháideacha a bhfuil sé ar intinn acu an trealamh a úsáid le haghaidh a n–úsáide pearsanta, gníomhaíochtaí fóillíochta nó spóirt.
Comhréireacht trealaimh bhrú iniompartha
Ní mór do threalamh brú iniompartha na ceanglais ábhartha maidir le measúnú comhréireachta, cigireacht thréimhsiúil, cigireacht idirmheánach agus seiceálacha eisceachtúla a chomhlíonadh, mar aon le sonraíochtaí na doiciméadachta ar monaraíodh an trealamh ina leith.
Saorghluaiseacht trealaimh bhrú iniompartha
Ní fhéadfaidh aon tír AE toirmeasc, srianadh nó bac a chur ar shaorghluaiseacht, ar chur ar an margadh ná ar úsáid trealaimh bhrú iniompartha ar a gcríoch, má chomhlíonann sé an treoir seo.
CÉN UAIR ATÁ TOSACH FEIDHME NA TREORACH?
Tá feidhm léi ón 20 Iúil 2010 agus b’éigean di a bheith ina dlí i dtíortha AE faoin 30 Meitheamh 2011.
CÚLRA
Le haghaidh tuilleadh faisnéise, féach:
PRÍOMHTHÉARMAÍ
Trealamh brú iniompartha: an grúpa trealaimh ina gcumhdaítear an méid seo a leanas:
- gach coimeádán brú, a gcomhlaí agus gabhálais eile nuair is iomchuí;
- tancanna, feithiclí/vaigíní ceallraí, coimeádáin gháis ileilimintí, agus sorcóirí le haghaidh gás, a gcomhlaí agus gabhálas eile nuair is iomchuí;
- áirítear leis cartúis gháis ach ní áirítear aerasóil, coimeádáin chrióigineacha oscailte, sorcóirí gáis le haghaidh gaireas análaithe agus múchtóirí dóiteáin.
Comhartha Pi: comhartha a léiríonn go gcomhlíonann an trealamh brú iniompartha na ceanglais infheidhme um measúnú comhréireachta a leagtar amach i dTreoir 2008/68/CE agus i dTreoir 2010/35/AE.
Comhlacht dá dtugtar fógra: comhlacht cigireachta a chomhlíonann na ceanglais atá leagtha amach sna hIarscríbhinní a ghabhann le Treoir 2008/68/CE agus na coinníollacha atá leagtha amach i dTreoir 2010/35/AE agus a chuirtear in iúl don tír AE ina bhfuil sé bunaithe.
PRÍOMHDHOICIMÉAD
Treoir 2010/35/AE ó Pharlaimint na hEorpa agus ón gComhairle an 16 Meitheamh 2010 maidir le trealamh brú iniompartha agus lena n–aisghairtear Treoir 76/767/CEE, 84/525/CEE, 84/526/CEE, 84/527/CEE agus 1999/36/CE ón gComhairle (IO L 165, 30.6.2010, lgh. 1-18)
DOICIMÉID GHAOLMHARA
Treoir 2008/68/CE ó Pharlaimint na hEorpa agus ón gComhairle an 24 Meán Fómhair 2008 maidir le hiompar intíre earraí contúirteacha (IO L 260, 30.9.2008, lgh. 13-59)
Rinneadh leasuithe comhleanúnacha ar Threoir 2008/68/CE a chorprú sa bhundoiciméad. Níl de luach ar an leagan comhdhlúite seo ach luach doiciméadach amháin.
Nuashonraithe 27.09.2019