Rifużjoni tal-VAT: persuni taxxabbli stabbiliti f’pajjiż ieħor tal-UE

 

SOMMARJU TA’:

Direttiva 2008/9/KE — regoli għar-rifużjoni tat-taxxa fuq il-valur miżjud lil persuni taxxabbli mhux stabbiliti fil-pajjiż tal-UE ta’ rifużjoni, iżda stabbiliti f’pajjiż ieħor tal-UE

XI JKUN L-GĦAN TAD-DIRETTIVA?

Tistabbilixxi r-regoli ddettaljati għar-rifużjoni tat-taxxa fuq il-valur miżjud (VAT), prevista fid-Direttiva 2006/112/KE, is-sistema komuni tal-UE għat-taxxa fuq il-valur miżjud (VAT), lil persuni taxxabbli mhux stabbiliti fil-pajjiż tal-UE ta’ rifużjoni* iżda stabbiliti f’pajjiż ieħor tal-UE.

PUNTI EWLENIN

Id-direttiva tapplika għal kwalunkwe persuna taxxabbli mhux stabbilita fil-pajjiż tal-UE ta’ rifużjoni (iżda stabbilita f’pajjiż ieħor tal-UE) li, tul il-perjodu ta’ rifużjoni:

• ma kellhiex, f’dak il-pajjiż tal-UE, is-sede tal-attivitajiet ekonomiċi tagħha, stabbiliment fiss li minnu jkunu ġew effettwati tranżazzjonijiet ta’ negozju jew, jekk l-ebda tali sede jew stabbiliment fiss ma eżistew, id-domiċilju jew il-post normali ta’ residenza tagħha;
• f’dak il-pajjiż tal-UE, ma tkun forniet l-ebda oġġetti jew servizzi bl-eċċezzjoni ta’ ċerti servizzi ta’ trasport eżentati u l-forniment ta’ oġġetti u servizzi lil persuna obbligata li tħallas il-VAT.

Il-pajjiżi tal-UE jeħtiġilhom jirrimborsaw lil kwalunkwe persuna taxxabbli mhux stabbilita fil-pajjiż li jkun (iżda stabbilita f’pajjiż ieħor tal-UE) kwalunkwe VAT imposta fir-rigward ta’ oġġetti jew servizzi fornuti lilha minn persuni oħra taxxabbli f’dak il-pajjiż tal-UE jew fir-rigward ta’ oġġetti importati f’dak il-pajjiż meta dawn jintużaw għall-finijiet tat-tranżazzjonijiet elenkati fid-Direttiva 2006/112/KE.

Biex tkun eliġibbli għal rifużjoni fil-pajjiż tal-UE ta’ rifużjoni, persuna taxxabbli mhux stabbilita f’dak il-pajjiż jeħtiġilha twettaq tranżazzjonijiet li jagħtu lok għal dritt ta’ tnaqqis fil-pajjiż tal-UE ta’ stabbiliment tagħha stess. Meta persuna taxxabbli mhux stabbilita fil-pajjiż tal-UE ta’ rifużjoni twettaq, fil-pajjiż tal-UE li fih hija stess tkun stabbilita, kemm tranżazzjonijiet li jagħtu lok għal dritt ta’ tnaqqis kif ukoll tranżazzjonijiet li ma jagħtux lok għal dritt ta’ tnaqqis f’dak il-pajjiż, il-pajjiż tal-UE ta’ rifużjoni jħallas biss il-proporzjon ta’ VAT li jkun rimborsabbli.

Applikazzjoni għal rifużjoni

Din id-direttiva tintroduċi proċedura għalkollox elettronika. Il-persuna taxxabbli mhux stabbilita fil-pajjiż tal-UE ta’ rifużjoni (iżda stabbilita f’pajjiż ieħor tal-UE) tibgħat applikazzjoni elettronika għal rifużjoni lill-pajjiż tal-UE ta’ rifużjoni permezz tal-portal elettroniku tal-pajjiż tal-UE tagħha stess. L-applikazzjoni għal rifużjoni tirrigwarda l-VAT fuq ix-xiri ta’ oġġetti jew servizzi fatturati tul il-perjodu ta’ rifużjoni u l-oġġetti importati tul il-perjodu ta’ rifużjoni.

L-Applikazzjoni għal rifużjoni trid tiġi sottomessa lill-pajjiż tal-UE ta’ stabbiliment qabel it-30 ta’ Settembru tas-sena kalendarja ta’ wara l-perjodu ta’ rifużjoni. Bi prinċipju, l-ammont ta’ rifużjoni tal-VAT li għalih issir l-applikazzjoni m’għandux ikun inqas minn €400 (jew €50 fil-każijiet fejn ikunu ssodisfati ċerti kundizzjonijiet). Jekk il-pajjiż idewwem il-ħlas tar-rifużjoni, l-applikant ikun intitolat għal mgħax fuq l-ammont ta’ rifużjoni. Il-pajjiż tal-UE ta’ stabbiliment jeħtieġlu jibgħat lill-applikant konferma elettronika li jkun irċeviha mingħajr dewmien.

META BDIET TAPPLIKA D-DIRETTIVA?

Ilha tapplika mill-20 ta’ Frar 2008 u kellha ssir liġi fil-pajjiżi tal-UE sal-1 ta’ Jannar 2010. Dan iħassar id-Direttiva 79/1072/KEE.

SFOND

Għal aktar informazzjoni, ara:

• Rifużjoni tal-VAT (il-Kummissjoni Ewropea).

TERMINI EWLENIN

DOKUMENT EWLIENI

Id-Direttiva tal-Kunsill 2008/9/KE tat-12 ta’ Frar 2008 li tistabbilixxi regoli dettaljati għar-rifużjoni tat-taxxa fuq il-valur miżjud, prevista fid-Direttiva 2006/112/KE, għal persuni taxxabbli mhux stabbiliti fl-Istat Membru ta’ rifużjoni iżda stabbiliti fi Stat Membru ieħor (ĠU L 44, 20.2.2008, pp. 23-28)

Emendi suċċessivi għad-Direttiva 2008/9/KE ġew inkorporati fit-test oriġinali. Din il-verżjoni konsolidata hija ta’ valur dokumentarju biss.

DOKUMENTI RELATATI

Regolament ta’ Implimentazzjoni tal-Kummissjoni (UE) Nru 79/2012 tal-31 ta’ Jannar 2012 li jistabbilixxi regoli dettaljati għall-implimentazzjoni ta’ ċerti dispożizzjonijiet tar-Regolament tal-Kunsill (UE) Nru 904/2010 dwar il-kooperazzjoni amministrattiva u l-ġlieda kontra l-frodi fil-qasam tat-taxxa fuq il-valur miżjud (ĠU L 29, 1.2.2012, pp. 13-32)

Emendi suċċessivi għar-Regolament (UE) Nru 79/2012 ġew inkorporati fit-test oriġinali. Din il-verżjoni konsolidata hija ta’ valur dokumentarju biss.

Regolament tal-Kunsill (UE) Nru 904/2010 tas-7 ta’ Ottubru 2010 dwar il-kooperazzjoni amministrattiva u l-ġlieda kontra l-frodi fil-qasam tat-taxxa fuq il-valur miżjud (ĠU L 268, 12.10.1997, pp. 1-18)

Ara l-verżjoni konsolidata.

l-aħħar aġġornament 19.10.2018