Il-livelli massimi għal ċerti kontaminanti fl-ikel

 

SOMMARJU TA’:

Ir-Regolament (KE) Nru 1881/2006 li jiffissa l-livelli massimi ta’ ċerti kontaminanti fl-oġġetti tal-ikel

X’INHU L-GĦAN TAR-REGOLAMENT?

Dan jistabbilixxi l-limiti massimi għal ċerti kontaminanti tal-ikel biex tiġi protetta s-saħħa taċ-ċittadini tal-Unjoni Ewropea (UE), inklużi l-aktar gruppi sensittivi tal-popolazzjoni, bħat-tfal, l-anzjani u n-nisa tqal.

PUNTI EWLENIN

Kamp ta’ applikazzjoni

Ir-Regolament ikopri:

• mikotossini (aflatossini, okratossini A, tossini tal-fusarium, patulin u ċitrinin, alkalojdi tal-ergot)
• metalli (ċomb, kadmju, merkurju, landa mhux organika u arseniku)
• 3-monokloropropan-1,2-diol (3-MCPD) u l-esteri tal-aċidi grassi tiegħu u l-esteri tal-aċidu xaħmi gliċidil
• diossini u poliklorobifenili (PCBs)
• idrokarburi poliċikliċi aromatiċi (PAHs)
• melamina
• l-aċidu eruċiku, l-aċidu idroċiku, l-alkalojdi tropane, alkalojdi tal-pirrolizidin
• nitrati
• perklorat.

Limiti

Ikel b’livelli ta’ kontaminanti ogħla minn dawk speċifikati fl-anness tar-Regolament ma jistax jinbiegħ. Dawn il-limiti jkopru l-parti li tittiekel tal-ikel u japplikaw ukoll għal ikel kompost, ipproċessat, imnixxef jew dilwit.

Ir-Regolament jistabbilixxi wkoll l-iktar livelli massimi baxxi għall-kontaminanti li jistgħu jinkisbu b’mod raġonevoli permezz ta’ prattika ta’ manifattura tajba jew prattika agrikola tajba, jiġifieri “l-aktar baxx li jista’ jintlaħaq raġonevolement”.

Projbizzjoni fuq it-taħlit

• L-ikel li jikkonforma mal-limiti massimi ma jistax jitħallat ma’ ikel ieħor li jaqbeż dawn il-limiti.
• L-ikel li jrid jiġi ssortjat jew ikun suġġett għal trattamenti fiżiċi sabiex jitnaqqas il-livell ta’ kontaminazzjoni ma jistax jitħallat ma’ ikel intenzjonat għall-konsum uman dirett jew użat bħala ingredjent fl-ikel.

Tikkettar

• L-ittikkettar fuq ġwież tal-art, żrieragħ oħra taż-żejt, ġewż, frott imnixxef, ross u qamħirrun mibjugħa bħala ikel li ma ġiex soġġett għall-issortjar jew trattament fiżiku ieħor qabel il-konsum mill-bniedem irid jinkludi l-kliem “Il-prodott irid ikun soġġett għall-issortjar jew xi trattament fiżiku ieħor biex titnaqqaslu l-kontaminazzjoni bl-aflatossin qabel il-konsum mill-bniedem jew l-użu bħala ingredjent f’oġġetti tal-ikel”.
• It-tikkettar fuq il-ġewż tal-art imballati minn qabel, żrieragħ oħra taż-żejt, prodotti derivati minn żrieragħ taż-żejt u ċereali jrid jindika l-kodiċi tal-użu u tal-identifikazzjoni tal-lott f’konformità mad-Direttiva 2011/91/UE dwar it-traċċabbiltà tal-ikel imballat minn qabel (ara s-sommarju).

Eċċezzjonijiet

• Xi Stati Membri tal-UE jistgħu jaqbżu l-livelli ta’ diossini u PCBs għal ċertu ħut u prodotti tal-ħut li joriġinaw mir-reġjun Baltiku u li jkunu maħsuba għall-konsum fit-territorju tagħhom. Il-konsumaturi jridu jiġu infurmati dwar ir-riskji potenzjali għas-saħħa tal-konsumatur.
• Ingħataw eċċezzjonijiet oħra lil ċerti Stati Membri fir-rigward tal-livelli massimi ta’ PAHs f’laħam affumikat tradizzjonalment u prodotti tal-laħam affumikati u ħut tradizzjonalment affumikati u prodotti tas-sajd affumikati.

Ittestjar

L-Istati Membri jridu jittestjaw il-livelli ta’ kontaminanti fl-ikel. Ir-riżultati tagħhom iridu jintbagħtu lill-Awtorità Ewropea dwar is-Sigurtà fl-Ikel stabbilita skont ir-Regolament (KE) Nru 178/2002 (ara s-sommarju).

Emendi għar-Regolament (KE) Nru 1881/2006

Ir-Regolament ġie emendat aktar minn 30 darba. Ħafna minn dawn l-emendi huma relatati mal-anness tar-Regolament, li jelenka l-livelli massimi għal ċerti kontaminanti fl-oġġetti tal-ikel.

MINN META BEDA JAPPLIKA DAN IR-REGOLAMENT?

Dan ilu japplika mill-1 ta’ Marzu 2007.

SFOND

Għal aktar informazzjoni, ara:

• Kontaminanti (il-Kummissjoni Ewropea)
• Kontaminanti kimiċi (Awtorità Ewropea dwar is-Sigurtà fl-Ikel).

DOKUMENT EWLIENI

Ir-Regolament tal-Kummissjoni (KE) Nru 1881/2006 tad-19 ta’ Diċembru 2006 li jiffissa l-livelli massimi ta’ ċerti kontaminanti fl-oġġetti tal-ikel (ĠU L 364, 20.12.2006, pp. 5–24).

L-emendi suċċessivi għar-Regolament (KE) Nru 1881/2006 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament (KE) Nru 178/2002 tal-Parlament Ewropew u tal-Kunsill tat-28 ta’ Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabbilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta’ sigurtà tal-ikel (ĠU L 31, 1.2.2002, pp. 1–24).

Ara l-verżjoni konsolidata.

Ir-Regolament tal-Kunsill (KEE) Nru 315/93 tat-8 ta’ Frar 1993 li jistabbilixxi proċeduri tal-Komunità għall-kontaminanti fl-ikel (ĠU L 37, 13.2.1993, pp. 1–3).

Ara l-verżjoni konsolidata.

l-aħħar aġġornament 26.03.2023