Comhaontú Comhlachais idir an tAontas Eorpach agus an tSile

 

ACHOIMRE AR:

Comhaontú Comhlachais idir AE, tíortha AE agus an tSile

Cinneadh 2002/979/CE maidir le síniú agus cur chun feidhme sealadach forálacha áirithe de Chomhaontú lena mbunaítear comhlachas idir an tAontas Eorpach agus an tSile

Cinneadh 2005/269/CE an 28 Feabhra 2005 maidir le tabhairt i gcrích an Chomhaontaithe lena mbunaítear comhlachas idir AE agus an tSile

CAD IS AIDHM LEIS AN GCOMHAONTÚ AGUS LEIS NA CINNTÍ?

• Féachtar leis an gcomhaontú comhlachas polaitiúil agus eacnamaíoch a chur ar bun idir an tAontas Eorpach agus an tSile.
• Cumhdaítear cúrsaí trádála, airgeadais, eolaíochta, teicniúla, sóisialta agus cultúrtha ann.
• Faomhtar leis na cinntí síniú agus cur i gcrích an chomhaontaithe thar ceann an Aontais Eorpaigh.

PRÍOMHPHOINTÍ

Tá trí shnáithe leis an gcomhaontú:

• idirphlé polaitiúil;
• comhar, agus
• trádáil.

Idirphlé polaitiúil

Féachtar leis an tsnáithe seo luachanna daonlathacha a chur chun cinn agus a chosaint. Tagann na páirtithe le chéile go rialta agus déanann siad a seasamh a chomhordú agus tugann siad faoi chomhthionscnaimh i bhfóraim idirnáisiúnta ar mhaithe le comhar maidir le beartas eachtrach agus slándála. Áirítear comhar i gcoinne sceimhlitheoireachta san idirphlé sin chomh maith.

Comhar

Is iad seo a leanas na cuspóirí leis an snáithe seo:

• acmhainn institiúideach a threisiú,
• forbairt shóisialta a chur chun cinn,
• sineirgí táirgiúla a spreagadh,
• comhar a mhéadú.

Comhar eacnamaíoch

Cumhdaítear leis seo réimsí a bhaineann le trádáil amhail comhar maidir le caighdeáin, rialacháin theicniúla agus nósanna imeachta um measúnú comhréireachta, comhar le cúrsaí custaim, comhar sna hearnálacha talmhaíochta agus tuaithe, bearta sláintíochta agus fíteashláintíochta, iascaigh agus staidreamh.

Cumhdaítear an méid a leanas le comhar eacnamaíoch:

• comhar tionsclaíoch trí theagmhálaithe, idirphlé méadaithe, tionscadail um chomhar tionsclaíoch agus nuálaíocht treisithe, éagsúlú agus cáilíocht táirgí;
• comhar chun forbairt fiontar beag agus meánmhéide a chur chun cinn;
• comhar maidir le seirbhísí, an comhshaol, fuinneamh, iompar, turasóireacht agus mianadóireacht;
• infheistíochta a chur chun cinn;
• cosaint tomhaltóirí agus cosaint sonraí;
• idirphlé mhaicreacnamaíoch;
• cearta maoine intleachtúla; agus
• soláthar poiblí, sa chás go gcuirtear cúnamh teicniúil ar fáil.

Comhar i réimse na heolaíochta, réimse na teicneolaíochta agus réimse na sochaí faisnéise

Tá an méid sin dírithe ar idirphlé, malartú faisnéise, trádáil a chur chun cinn, oiliúint, comhthionscadail agus dlús a chur le gníomhaíochtaí sa réimse sin.

Comhar i réimse an chultúir, réimse an oideachais agus sa réimse closamhairc

Féachtar leis tacaíocht mharthanach a áirithiú ar gach leibhéal oideachais agus rochtain ar oideachas a sholáthar do ghrúpaí sóisialta leochaileacha amhail daoine faoi mhíchumas nó daoine fíorbhochta.

Áirítear leis na gníomhaíochtaí comhchláir oiliúna agus malartuithe i réimse an phreasa, na scannánaíochta, na teilifíse agus na hóige.

Comhar ar leibhéal riaracháin nó idirinstitiúideach

Tá sé d’aidhm leis sin riarachán poiblí a nuachóiriú agus a dhílárú. Baintear é sin amach trí chúnamh teicniúil, taithí agus fios gnó a chomhroinnt, agus trí staidéir agus oiliúint.

Comhar sóisialta

Tá sé d’aidhm leis sin páirtithe sóisialta a spreagadh le bheith rannpháirteach, mar aon le bearta chun idirdhealú a chosc i gcoinne náisiúnaigh ceachtar den dá pháirtí atá ina gcónaí go dlíthiúil i gcríoch an pháirtí eile. Tugtar tosaíocht do na bearta lena ndéantar an méid a leanas:

• forbairt dhaonna a spreagadh,
• ról na mban a chur chun cinn,
• caidreamh saothair a nuachóiriú,
• seirbhís sláinte éifeachtúil a fhorbairt,
• cruthú post a chur chun cinn.

Gnéithe trádála

Tá na clásail lena rialaítear trádáil agus cúrsaí a bhaineann le trádáil le fáil i gCuid IV den chomhaontú. Cumhdaítear gnéithe ann lena n–áirítear an méid a leanas:

• léirscaoileadh ar thrádáil in earraí agus seirbhísí;
• feabhsú na timpeallachta infheistíochta;
• léirscaoileadh ar íocaíochtaí reatha agus ar ghluaiseachtaí caipitil;
• margaí soláthair rialtais a oscailt;
• cearta maoine intleachtúla a chosaint;
• meicníocht éifeachtach a chur ar bun chun díospóidí a réiteach.

Cur chun feidhme an chomhaontaithe

Cuirtear Comhairle Comhlachais ar bun chun maoirseacht a dhéanamh ar chur chun feidhme an chomhaontaithe.

Leasuithe

Leasaíodh an comhaontú roinnt uaireanta. Rinneadh na leasuithe sin ar na cúiseanna seo a leanas:

• tháinig tíortha nua isteach in AE ag céimeanna éagsúla, lena n-áirítear an ceann is déanaí, an Chróit;
• rinneadh athruithe ar na hiarscríbhinní agus na haguisíní leis an gcomhaontú maidir le trádáil táirgí áirithe amhail fíonta agus biotáillí;
• rinneadh nuashonrú ar na rialacha a bhaineann le hiompar díreach;
• athruithe teicneolaíochta (e.g. ar tháirgeadh cruach).

DÁTA TEACHT I BHFEIDHM

Tháinig an comhaontú i bhfeidhm ar an 1 Márta 2005.

CÚLRA

Chun tuilleadh faisnéise a fháil, féach:

• An tSile (An Coimisiún Eorpach).

PRÍOMHDHOICIMÉID

Comhaontú lena mbunaítear comhlachas idir an Comhphobal Eorpach agus a Bhallstáit, de pháirt, agus Poblacht na Sile, den pháirt eile (IO L 352, 30.12.2002, lgh. 3-1450)

Rinneadh leasuithe agus ceartúcháin chomhleanúnacha ar an gconradh a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Cinneadh 2002/979/CE ón gComhairle an 18 Samhain 2002 maidir le síniú agus cur chun feidhme sealadach forálacha áirithe de Chomhaontú lena mbunaítear comhlachas idir an Comhphobal Eorpach agus a Bhallstáit, de pháirt, agus Poblacht na Sile, den pháirt eile (IO L 352, 30.12.2002, lgh. 1-2)

Cinneadh 2005/269/CE ón gComhairle an 28 Feabhra 2005 maidir le tabhairt i gcrích an Chomhaontaithe lena mbunaítear comhlachas idir an Comhphobal Eorpach agus a Bhallstáit, de pháirt, agus Poblacht na Sile, den pháirt eile (IO L 84, 2.4.2005, lgh. 19-20)

DOICIMÉID GHAOLMHARA

Faisnéis maidir le teacht i bhfeidhm an Chomhaontaithe lena mbunaítear comhlachas idir an Comhphobal Eorpach agus a Bhallstáit agus Poblacht na Sile (IO L 84, 2.4.2005, lch. 21)

Cinneadh 2003/589/CE ón gComhairle an 21 Iúil 2003 maidir le tabhairt i gcrích an Chomhaontaithe le haghaidh comhar eacnamaíochta agus teicneolaíochta idir an Comhphobal Eorpach agus Poblacht na Sile (IO L 199, 7.8.2003, lch. 19)

Comhaontú le haghaidh comhar eacnamaíochta agus teicneolaíochta idir an Comhphobal Eorpach agus Poblacht na Sile (IO L 199, 7.8.2003, lgh. 20-27)

Cinneadh 98/708/CE ón gComhairle an 3 Samhain 1998 maidir le tabhairt i gcrích an Chomhaontaithe idir an Comhphobal Eorpach agus Poblacht na Sile maidir le réamhtheachtaithe agus substaintí ceimiceacha a úsáidtear go minic le haghaidh monarú neamhdhleathach drugaí támhshuanacha nó substaintí síceatrópacha (IO L 336, 11.12.1998, lgh. 46-47)

Comhaontú idir an Comhphobal Eorpach agus Poblacht na Sile maidir le réamhtheachtaithe agus substaintí ceimiceacha a úsáidtear go minic le haghaidh monarú neamhdhleathach drugaí támhshuanacha nó substaintí síceatrópacha (IO L 336, 11.12.1998, lgh. 48-54)

Nuashonraithe 12.05.2021