EUR-Lex Rochtain ar dhlí an Aontais Eorpaigh

Fill ar leathanach baile EUR-Lex

Is sliocht ón suíomh gréasáin EUR-Lex atá sa doiciméad seo

An Comhshaol agus an t-athrú aeráide

environment

Is bagairt eiseach don Eoraip agus don domhan iad an t-athrú aeráide agus díghrádú an chomhshaoil. Chun na dúshláin sin a shárú, déanfaidh an Comhaontú Glas don Eoraip geilleagar nua-aimseartha iomaíoch atá tíosach ar acmhainní a dhéanamh den Aontas Eorpach (AE), rud a chinnteoidh an méid seo a leanas:

  • glanastaíochtaí gás ceaptha teasa ar bith faoi 2050;
  • fás eacnamaíoch díchúpláilte ó úsáid acmhainní;
  • nach mbeidh aon duine agus aon áit fágtha inár ndiaidh.

Tá sé d’aidhm aige freisin caipiteal nádúrtha an Aontais a chosaint, a chaomhnú agus a fheabhsú, agus sláinte agus folláine na saoránach a chosaint ar rioscaí agus tionchair a bhaineann leis an gcomhshaol.

Bíonn ár sláinte, ár ngeilleagar agus ár bhfolláine ag brath ar staid an chomhshaoil, a bhfuil dúshláin thromchúiseacha éagsúla os a gcomhair, go háirithe dúshláin a bhaineann leis an athrú aeráide, tomhaltas agus táirgeadh neamh-inbhuanaithe, chomh maith le cineálacha éagsúla truaillithe.

Déanann straitéisí comhshaoil an Aontais, amhail an plean gníomhaíochta nua don gheilleagar ciorclach, an straitéis bhithéagsúlachta do 2030, an straitéis ón bhfeirm go dtí an forc, an plean gníomhaíochta maidir le truailliú nialasach, agus an reachtaíocht gnáthóga nádúrtha a chosaint, an t-aer agus an t-uisce a choinneáil glan, diúscairt chuí dramhaíola a chinntiú, feabhas a chur ar an eolas faoi cheimiceáin thocsaineacha agus cabhrú le gnólachtaí bogadh i dtreo geilleagar inbhuanaithe ina maireann daoine go maith, laistigh de theorainneacha an phláinéid.

Tá an tAontas ag comhrac an athraithe aeráide agus an díghrádaithe comhshaoil trí bheartais uaillmhianacha sa bhaile agus trí dhlúthchomhar le comhpháirtithe idirnáisiúnta. Déanann an tAontas beartais agus straitéisí aeráide a cheapadh agus a chur chun feidhme, agus ról ceannasach á ghlacadh aige san idirbheartaíocht idirnáisiúnta maidir leis an aeráid. Tá sé tiomanta do chur chun feidhme rathúil Chomhaontú Pháras a áirithiú agus do chóras trádála astaíochtaí an Aontais Eorpaigh a chur chun feidhme.

Scríobhann an dlí aeráide Eorpach ina dhlí an sprioc a leagtar amach sa Chomhaontú Glas don Eoraip chun go mbeidh geilleagar agus sochaí na hEorpa neodrach ó thaobh na haeráide de faoi 2050. Leagtar síos sa dlí freisin an sprioc idirmheánach glanastaíochtaí gás ceaptha teasa a laghdú 55 % ar a laghad faoi 2030, i gcomparáid le leibhéil 1990. Féachann AE lena chinntiú go gcuirtear buarthaí faoin aeráid san áireamh i réimsí beartais eile (e.g. iompar agus fuinneamh) agus cuireann sé teicneolaíochtaí ísealcharbóin agus bearta oiriúnaithe chun cinn chomh maith.

Is croíphrionsabal den Chonradh ar an Aontas Eorpach í an fhorbairt inbhuanaithe agus is cuspóir tosaíochta í do bheartais inmheánacha agus sheachtracha an Aontais. Is gealltanas uilíoch iad clár oibre 2030 na Náisiún Aontaithe agus a spriocanna forbartha inbhuanaithe chun deireadh a chur leis an mbochtaineacht agus domhan inbhuanaithe a bhaint amach faoi 2030 agus ina dhiaidh sin, agus folláine an duine agus pláinéad folláin ina chroílár.