Nindirizzaw it-tibdil fil-klima

It-tibdil fil-klima hi waħda mill-ikbar sfidi li qed tiffaċċja l-umanità fis-snin li ġejjin. Temperaturi dejjem jisħnu, it-tidwib tal-glaċieri u n-nixfa li dejjem qed issir aktar frekwenti, u l-għargħar, huma kollha evidenza li t-tibdil fil-klima qiegħed tabilħaqq iseħħ. Ir-riskji għall-pjaneta kollha u għall-ġenerazzjonijiet futuri huma kolossali u hemm bżonn li tittieħed azzjoni urġenti.
L-Unjoni Ewropea issa ilha diversi snin impenjata biex taffronta t-tibdil fil-klima kemm internament kif ukoll internazzjonalment, u tagħti priojorità fl-aġenda tal-UE, kif rifless fil-politika Ewropea dwar it-tibdil fil-klima. Tabilħaqq, l-UE qed tieħu azzjoni biex jitnaqqsu l-emissjonijiet tal-gassijiet serra fl-oqsma kollha tal-attività tagħha fi sforz biex jinkisbu l-għanijiet li ġejjin: il-konsum ta' enerġija li tniġġes inqas b'mod aktar effiċjenti, il-ħolqien ta' metodi ta' trasport aktar nodfa u aktar bilanċjati, li l-kumpaniji jsiru iktar ambjentalment responsabbli mingħajr ma tiġi kompromessa l-kompetittività tagħhom, li jiġi żgurat ippjanar dwar użu tal-art u agrikoltura li jkun favur l-ambjent, u jinħolqu kundizzjonijiet li jinkoraġġixxu r-riċerka u l-innovazzjoni.

POLITIKA TAL-UE DWAR IT-TIBDIL FIL-KLIMA
- Qafas realistiku ta' politika għal żmien twil
  Wara l-ħidma taħt il-Programm Ewropew għat-Tibdil fil-Klima (PETK), l-Unjoni Ewropea ipproponiet strateġija realistika dwar it-tibdil fil-klima, u tat parir għal azzjoni prattika biex tiġi evitata żieda fit-temperaturi ta’ aktar minn 2 °C fuq il-livelli preindustrijali.
- It-tnaqqis fl-emissjonijiet tal-gassijiet serra bħala għan ta' prijorità
  It-tnaqqis tal-gassijiet serra hu komponent ewlieni tal-azzjoni Ewropea. L-UE għandha mekkaniżmu ta' monitoraġġ li qed jiffunzjona biex iżomm rekord regolari tal-emissjonijiet u l-assorbiment ta' dawn il-gassijiet. Bil-ħsieb li jitnaqqsu gradwalment l-emissjonijiet, l-UE stabbiliet ukoll sistema bbażata fuq ir-regoli tas-suq, skema ta' skambju ta' emissjonijiet ta' gassijiet serra u regoli speċifiċi dwar gassijiet serra fluworinati.
- Il-monitoraġġ u l-adattament għall-konsegwenzi inevitabbli tat-tibdil fil-klima
  Diġà qegħdin inħossu l-effetti tat-tibdil fil-klima. Il-firxa ta' dawn l-effetti tista' titkejjel grazzi għas-sistema ta' monitoraġġ GMES, filwaqt li numru ta' miżuri Ewropej jipprovdu risposta ta' emerġenza. Dawn jinkludu, b'mod partikolari, il-Mekkaniżmu Komunitarju tal-Protezzjoni Ċivili u miżuri speċifiċi li jikkonċernaw għargħar u nixfa. Fl-2007, il-Kummissjoni adottat Green Paper dwar l-adattament għat-tibdil fil-klima fl-Ewropa.
- Il-Protokoll ta' Kjoto u l-impenn tal-UE fin-negozjati internazzjonali
  Fl-arena internazzjonali, l-UE hi fuq quddiem nett tal-ġlieda kontra t-tibdil fil-klima u tipparteċipa attivament fin-negozjati dwar is-suġġett. Fl-1998, l-UE ffirmat il-Protokoll ta' Kjoto għall-Konvenzjoni Qafas tan-Nazzjonijiet Uniti dwar it-Tibdil fil-Klima, li tittratta sitt gassijiet serra. Flimkien ma' dan, biex tgħin lil pajjiżi li qegħdin jiżviluppaw jilħqu l-isfida tat-tibdil fil-klima, l-UE adottat strateġija dwar it-tibdil fil-klima fil-kuntest tal-kooperazzjoni għall-iżvilupp.
ENERĠIJA LI TNIĠĠES INQAS, ENERĠIJA IKTAR EFFIĊJENTI
- L-iffokar tas-suq tal-enerġija dwar is-sigurtà u s-sostenibbiltà tal-provvista
  Bil-pakkett ta' miżuri adottati fl-2007, l-UE stabbiliet il-pedamenti għal politika ġenwina u komuni dwar l-enerġija. Din is-serje ta' miżuri tiffoka wkoll is-suq tal-enerġija fuq is-sostenibbiltà, b'mod partikolari permezz ta' miżuri fiskali.
- Il-kontroll u r-razzjonalizzazzjoni tal-konsum tal-enerġija, grazzi għall-effiċjenza tal-enerġija
  L-UE nediet konsultazzjoni fuq skala kbira bbażata fuq Green Paper u adottat Pjan ta' Azzjoni għall-perjodu 2007-2010 biex tagħmel l-effiċjenza tal-enerġija u l-iffrankar tal-enerġija, komponent ewlieni tal-politika Ewropea dwar l-enerġija. Adottat ukoll miżuri speċifiċi, b'mod partikolari dwar l-effiċjenza tal-enerġija u l-ittikkettar ta' prodotti li jużaw l-enerġija.
- Nagħmlu l-enerġija rinnovabbli alternattiva ġenwina u affordabbli
  Total ta' 20 % tal-konsum tal-enerġija Ewropew għandu jiġi minn sorsi rinnovabbli sal-2020: din hi l-mira li l-UE stabbiliet għaliha nnifisha fl-2007. Biex jintlaħaq dan il-għan, l-UE adottat miżuri mmirati biex jippromwovu sorsi ta' enerġija rinnovabbli u l-iżvilupp tas-swieq fis-setturi tal-bijomassa u bijofluwils, fost l-oħrajn.
TRASPORT AKTAR NADIF U AKTAR IBBILANĊJAT
- Il-kisba tal-għanijiet tal-politika tat-trasport
  Ir-rivitalizzazzjoni ambizzjuża tal-politika tat-trasport tal-UE, permezz tal-White Paper adottata fl-2001, se tagħti kontribut sinifikanti biex tnaqqas l-impatt tat-trasport fuq it-tibdil fil-klima. It-twettieq ta’ dan il-għan se jkun jeħtieġ, b'mod partikolari, immaniġġjar aħjar tat-trasport tal-merkanzija u l-utilizzazzjoni tat-teknoloġija.
  - Loġistika tat-trasport tal-merkanzija fl-Ewropa
  - White Paper: Politika Ewropea dwar it-trasport għall-2010Arkivji
- Ir-rikonċiljazzjoni tat-trasport bl-art u bl-ajru mal-ambjent
  L-UE adottat firxa wiesgħa ta' miżuri biex tnaqqas l-impatt tat-trasport bl-art u bl-ajru, li jinkludu miżuri li jnaqqsu l-livelli ta' emissjonijiet li jniġġsu, miżuri ta' mmaniġġjar tat-traffiku u miżuri fiskali.
- Il-promozzjoni tat-trasport bil-ferrovija u kanali tal-ilma u l-intermodalità
  Biex jittejjeb il-bilanċ bejn il-metodi tat-trasport u biex tippromwovi mezzi ta' trasport li jniġġsu inqas, l-UE tappoġġja l-iżvilupp ta' miżuri li jippromwovu t-trasport bil-ferrovija, trasport marittimu u trasport fuq kanali tal-ilma, u biex jingħaqdu l-modi differenti ta' trasport (intermodalità).
KUMPANIJI KOMPETITTIVI U RESPONSABBLI
Il-kumpaniji huma obbligati li jikkunsidraw — u jnaqqsu — l-impatt tal-attivitajiet tagħhom fuq l-ambjent (skont il-prinċipju "min iniġġes iħallas"). Numru ta' strumenti ta' ġestjoni ambjentali huma disponibbli biex jgħinuhom jagħmlu dan.
- Responsabbiltà ambjentali
AGRIKOLTURA U PPJANAR GĦALL-UŻU TAL-ART GĦALL-BENEFIĊĊJU TAL-AMBJENT
Emissjonijiet ta' gassijiet serra li jsiru mill-bniedem jistgħu jitnaqqsu billi jkun hemm immaniġġjar kif suppost tal-art u l-użu tal-art li jinkludi, fost affarijiet oħra, il-ħażna tal-karbonju u l-promozzjoni ta' attivitajiet li joħolqu emissjonijiet baxxi.
QAFAS ADOTTAT GĦALL-INNOVAZZJONI
L-UE nediet sensiela ta' pakketti diretti u indiretti ta' assistenza finanzjarja, b'mod partikolari biex tappoġġa proġetti innovattivi u żvilupp teknoloġiku.

EUROPA

Sommarji tal-leġiżlazzjoni

Nindirizzaw it-tibdil fil-klima