Il-Konvenzjoni dwar il-konservazzjoni tal-ispeċje migratorji tal-annimali selvaġġi — il-Konvenzjoni ta’ Bonn
SOMMARJU TA’:
Il-Konvenzjoni dwar il-konservazzjoni tal-ispeċje migratorji tal-annimali selvaġġi
Id-Deċiżjoni 82/461/KEE – konklużjoni tal-konvenzjoni dwar il-konservazzjoni tal-ispeċje migratorji tal-annimali selvaġġi
X’INHU L-GĦAN TAL-KONVENZJONI U TAD-DEĊIŻJONI?
- L-għan tal-Konvenzjoni ta’ Bonn huwa l-konservazzjoni tal-ispeċje migratorji* ta’ annimali selvaġġi madwar id-dinja. L-annimali selvaġġi jeħtieġu attenzjoni speċjali minħabba l-importanza tagħhom mil-lat ambjentali, ekoloġiku, ġenetiku, xjentifiku, rikreattiv, kulturali, edukattiv, soċjali u ekonomiku. Il-konservazzjoni tal-ispeċje migratorji teħtieġ b’mod partikolari l-kooperazzjoni internazzjonali biex tiġi żgurata l-protezzjoni fil-medda* sħiħa tagħhom.
- Id-deċiżjoni tikkonkludi l-konvenzjoni f’isem il-KEE (issa l-UE).
PUNTI EWLENIN
- Il-Partijiet għall-konvenzjoni jirrikonoxxu l-importanza tal-konservazzjoni tal-ispeċje migratorji, u l-ħtieġa li tingħata attenzjoni speċjali lill-ispeċje li l-istatus ta’ konservazzjoni tagħhom* ma tkunx favorevoli.
- Biex jiġi evitat li kwalunkwe speċje migratorja tiġi fil-periklu*, il-partijiet għandu jkollhom l-għan li:
- jippromwovu, jikkooperaw fi jew jappoġġjaw ir-riċerka relatata mal-ispeċje migratorji; u
- jikkonkludu ftehimiet li jkopru l-konservazzjoni u l-ġestjoni tal-ispeċje migratorji elenkati fl-Appendiċi II.
- Biex jipproteġu l-ispeċje migratorji fil-periklu, il-partijiet tal-konvenzjoni se jkollhom l-għan li:
- jipprovdu protezzjoni immedjata għall-ispeċje migratorji inklużi fl-Appendiċi I;
- jikkonservaw jew jirrestawraw il-ħabitats tal-ispeċje fil-periklu;
- jipprevjenu, ineħħu, jikkumpensaw għal jew jimminimizzaw l-effetti negattivi ta’ attivitajiet jew ostakli li jimpedixxu l-migrazzjoni tal-ispeċje; u
- jipprevjenu, inaqqsu jew jikkontrollaw il-fatturi li huma ta’ periklu jew li x’aktarx jipperikolaw aktar l-ispeċje, safejn ikun fattibbli u xieraq.
- Il-pajjiżi ta’ medda ta’ speċje migratorji għandhom jipprojbixxu t-teħid ta’ annimali li jappartjenu għall-ispeċje elenkati fl-Appendiċi I, b’ċerti eċċezzjonijiet, bħal teħid għal skopijiet xjentifiċi, jew biex itejbu t-trobbija jew is-sopravivenza tal-ispeċje. Dawn l-eċċezzjonijiet għandhom ikunu preċiżi fir-rigward tal-kontenut u limitati fil-post u fiż-żmien, u ma għandhomx joperaw bi żvantaġġ għall-ispeċje.
- Il- konservazzjoni u l-immaniġġjar tal-ispeċje elenkati fl-Appendiċi II jistgħu jeħtieġu ftehimiet internazzjonali.
- Linji gwida għall-ftehimiet:
- jirrestawraw jew iżommu l-ispeċje migratorji kkonċernati;
- ikopru l-medda kollha tal-ispeċje migratorji kkonċernati;
- ikunu miftuħa għall-adeżjoni mill-pajjiżi kollha ta’ medda, kemm jekk huma partijiet għall-Konvenzjoni kif ukoll jekk le;
- fejn ikun fattibbli, jikkonċernaw diversi speċje.
- Kull ftehim għandu jkun fih l-informazzjoni li ġejja:
- l-isem tal-ispeċje migratorja kkonċernata;
- il-medda u r-rotta migratorja tagħha;
- miżuri għall-implimentazzjoni tal-ftehim;
- proċeduri għar-riżoluzzjoni ta’ tilwim;
- ħatra tal-awtorità kkonċernata bl-implimentazzjoni tal-ftehim.
- Il-ftehimiet jistgħu jipprovdu wkoll għal:
- riċerka dwar l-ispeċje;
- l-iskambju ta’ informazzjoni dwar l-ispeċje migratorji;
- ir-restawr jew il-manutenzjoni ta’ network ta’ ħabitats xierqa għall-konservazzjoni tal-ispeċje;
- reviżjoni perjodika tal-istatus ta’ konservazzjoni tal-ispeċje;
- proċeduri ta’ emerġenza li permezz tagħhom l-azzjoni ta’ konservazzjoni tissaħħaħ malajr.
- Tip differenti ta’ ftehimiet huma dawk taħt l-Artikolu IV(4) tal-Konvenzjoni. Dawn mhumiex ristretti għall-ispeċje elenkati fl-Appendiċi II tal-Konvenzjoni, u jistgħu jiġu konklużi għal kwalunkwe popolazzjoni jew kwalunkwe parti ġeografikament separata tal-popolazzjoni ta’ kwalunkwe speċje jew grupp tassonomiku aktar baxx ta’ annimali selvaġġi, li l-membri tagħhom perjodikament jaqsmu konfini ġurisdizzjonali nazzjonali waħda jew aktar.
- Il-Konferenza tal-Partijiet hija l-korp tat-teħid tad-deċiżjonijiet tal-konvenzjoni. Dan jirrevedi l-implimentazzjoni tal-konvenzjoni u jista’ jadotta rakkomandazzjonijiet.
- Il-konvenzjoni, u l-Appendiċi I u II tagħha, jistgħu jiġu emendati.
- Kull tilwima bejn il-partijiet għall-konvenzjoni għandha tiġi solvuta permezz ta’ negozjati bejn il-partijiet involuti. Jekk it-tilwima ma tkunx tista’ tiġi solvuta permezz ta’ negozjati, tista’ tiġi sottomessa għall-arbitraġġ, b’mod partikolari dak tal-Qorti Permanenti ta’ Arbitraġġ f’The Hague, li d-deċiżjoni tagħha tkun torbot lill-partijiet.
DATA TAD-DĦUL FIS-SEĦĦ
Il-Konvenzjoni ta’ Bonn ġiet iffirmata fl-1979 u daħlet fis-seħħ fl-1 ta’ Novembru 1983.
SFOND
Għal aktar informazzjoni, ara:
- Il-bijodiversità globali (il-Kummissjoni Ewropea)
- CMS (Konvenzjoni dwar il-Konservazzjoni ta’ Speċje Migratorji ta’ Annimali Selvaġġi).
TERMINI EWLENIN
L-ispeċje migratorji: il-popolazzjoni sħiħa jew kwalunkwe parti ġeografikament separata tal-popolazzjoni ta’ kwalunkwe speċje jew grupp tassonomiku aktar baxx ta’ annimali selvaġġi proporzjon sinifikanti tal-membri tagħhom b’mod ċikliku u b’mod prevedibbli jaqsmu konfini ġurisdizzjonali nazzjonali waħda jew aktar.
Medda: żoni ta’ art jew ilma li speċje migratorja tgħix fihom, taqsam jew taqbeż ir-rotta ta’ migrazzjoni tagħha.
Status ta’ konservazzjoni ta’ speċje migratorji: is-somma tal-influwenzi li jaġixxu fuq l-ispeċje migratorja li jistgħu jaffettwaw id-distribuzzjoni u l-abbundanza fit-tul tagħha.
Fil-periklu: l-ispeċje migratorji jinsabu fil-periklu tal-estinzjoni fit-territorju kollu jew f’parti minnu ta’ pajjiż.
DOKUMENTI EWLENIN
Il-Konvenzjoni dwar il-konservazzjoni tal-ispeċje migratorji tal-annimali selvaġġi (ĠU L 210, 19.7.1982, pp. 11-22)
Id-Deċiżjoni tal-Kunsill 82/461/KEE tal-24 ta’ Ġunju 1982 li tirrigwarda l-konklużjoni tal-Konvenzjoni dwar il-konservazzjoni tal-ispeċje migratorji tal-annimali selvaġġi (ĠU L 210, 19.7.1982, p. 10)
DOKUMENTI RELATATI
Id-Deċiżjoni tal-Kunsill 2006/871/KE tat-18 ta’ Lulju 2005 dwar il-konklużjoni, mill-Komunità Ewropea, tal-Ftehim dwar il-Konservazzjoni tal-Għasafar tal-Ilma Migratorji Afro-Ewroasjatiċi (ĠU L 345, 8.12.2006, pp. 24-25)
Id-Deċiżjoni tal-Kunsill 98/145/KE tat-12 ta’ Frar 1998 fuq l-approvazzjoni, f’isem il-Komunità Ewropea, tal-emendi għall-Appendiċi I u II għall-Konvenzjoni ta’ Bonn fuq il-konservazzjoni ta’ speċi migratorji ta’ Annimali Selvaġġi kif deċiż mill-ħames laqgħa tal-Konferenza tal-Partijiet għall-Konvenzjoni (ĠU L 46, 17.2.1998, pp. 6-7)
l-aħħar aġġornament 12.05.2020