EUR-Lex Aċċess għal-liġi tal-Unjoni Ewropea

Lura għall-paġna ewlenija ta' EUR-Lex

Dan id-dokument hu mislut mis-sit web tal-EUR-Lex

Enerġija

energy

Iż-żieda fl-evidenza tat-tibdil fil-klima u d-dipendenza dejjem tikber fuq l-enerġija enfasizzaw id-determinazzjoni tal-Unjoni Ewropea (UE) li ssir l-ewwel kontinent u ekonomija tad-dinja li tkun newtrali għall-klima u li tassigura li l-enerġija kkunsmata tkun waħda sigura, bla periklu, kompetittiva, prodotta lokalment u sostenibbli.

Il-Patt Ekoloġiku Ewropew jimmira biex jagħmel il-politiki tal-UE dwar il-klima, l-enerġija, it-trasport u t-tassazzjoni tajbin biżżejjed biex inaqqsu l-emissjonijiet netti tal-gassijiet serra b’mill-inqas 55 % sal-2030 meta mqabbel mal-livelli tal-1990, bil-għan li tintlaħaq in-newtralità għall-klima sal-2050, kif stipulat fil-Liġi Ewropea dwar il-Klima bħala obbligazzjoni legali. L-għanijiet tal-enerġija huma deċiżivi: li tiġi prodotta enerġija iktar nadifa grazzi għar-riċerka u l-innovazzjoni fit-teknoloġija u għall-investiment f’bini rinovat u effiċjenti fl-użu tal-enerġija.

Dawn l-għanijiet jibbażaw ruħhom fuq l-istrateġija tal-unjoni tal-enerġija (2015) li, flimkien mar-Regolament (UE) 2018/1999 dwar il-governanza tal-unjoni tal-enerġija, tiddefinixxi d-dimensjonijiet tal-politika tal-enerġija tal-UE.

  • Diversifikazzjoni tas-sorsi tal-enerġija tal-UE, li jvarjaw mill-fjuwils fossili, għal enerġija nukleari, għal enerġija minn sorsi rinnovabbli (xemx, riħ, bijomassa, ġeotermali, idroelettrika u bil-marei) biex tiġi assigurata is-sigurtà tal-enerġija.
  • Twettiq ta’ suq intern tal-enerġija li huwa kompletament integrat u effiċjenti mingħajr barrieri tekniċi jew regolatorji.
  • Titjib tal-effiċjenza enerġetika u tal-interkonnessjoni tan-netwerks tal-enerġija, u l-qtugħ tal-emissjonijiet.
  • Mixja lejn ekonomija b’karbonju baxx skont l-impenji stipulati fil-Ftehim ta’ Pariġi.
  • Promozzjoni tar-riċerka f’teknoloġiji b’karbonju baxx u b’enerġija nadifa, u l-prijoritizzazzjoni tar-riċerka u l-innovazzjoni biex jimbuttaw it-tranżizzjoni tal-enerġija u jtejbu l-kompetittività.

L-Artikolu 194 tat-Trattat dwar il-Funzjonament tal-Unjoni Ewropea jintroduċi bażi legali speċifika għall-qasam tal-enerġija bbażata fuq kompetenzi kondiviżi bejn l-UE u l-Istati Membri tal-UE, li jwassalhom għal politika ta’ enerġija komuni.