EUR-Lex Aċċess għal-liġi tal-Unjoni Ewropea

Lura għall-paġna ewlenija ta' EUR-Lex

Dan id-dokument hu mislut mis-sit web tal-EUR-Lex

Impjiegi u politika soċjali

employment_and_social_policy

L-Unjoni Ewropea (UE) timmira li tippromwovi l-progress soċjali u li ttejjeb il-kundizzjonijiet tal-ħajja u tax-xogħol għal kull min jinsab fl-UE, prinċipju minqux fil-preambolu tat-Trattat dwar il-Funzjonament tal-Unjoni Ewropea (TFUE). 

Skont it-TFUE — b’mod partikolari l-Artikolu 153 — l-UE tikkumplimenta l-inizzjattivi politiċi li ttieħdu minn Stati Membri individwali tal-UE billi tissettja standards minimi li għandhom jintlaħqu mill-Istati Membri kollha. 

Il-politiki dwar l-impjiegi fl-Ewropa, l-affarijiet soċjali u l-opportunitajiet indaqs jimmiraw biex itejbu l-kundizzjonijiet tal-għajxien u tax-xogħol billi jippromwovu impjiegi iktar u aħjar, ħiliet, ugwaljanza, protezzjoni soċjali u inklużjoni.

L-UE hija l-katalista għat-tibdil soċjali li tfittex li ssostni swieq tax-xogħol ġusti u li jaħdmu sew kif ukoll sistemi ta’ protezzjoni soċjali skont l-20 prinċipju ewlieni tal-Pilastru Ewropew tad-Drittijiet Soċjali. Skont il-pjan ta’ azzjoni tal-Pilastru Ewropew tad-Drittijiet Soċjali, sal-2030 mill-inqas 78 % tal-popolazzjoni bejn l-età ta’ 20 u 64 sena għandhom ikunu impjegati, mill-inqas 60 % tal-adulti kollha għandhom jipparteċipaw f’taħriġ kull sena u n-numru ta’ nies f’riskju ta’ faqar jew esklużjoni soċjali għandhom jitnaqqsu b’mill-inqas 15-il miljun, inkluż mill-inqas 5 miljun tifel u tifla.

Sabiex jintlaħqu dawn il-miri, l-UE qed tiżviluppa u tippromwovi politiki biex tassigura opportunitajiet u aċċess għas-suq tax-xogħol indaqs, iżżid l-impjiegi u l-mobilità tal-ħaddiema, ittejjeb il-kwalità tal-impjiegi u l-kundizzjonijiet tax-xogħol, tinforma u tikkonsulta l-ħaddiema, tiġġieled il-faqar u l-esklużjoni soċjali, tippromwovi opportunitajiet indaqs u tiġġieled id-diskriminazzjoni, u timmodernizza s-sistemi ta’ protezzjoni soċjali.

Il-baġit fit-tul tal-UE għall-2021–2027, flimkien mal-istrument ta’ rkupru NextGenerationEU jipprovdu fondi tal-UE bla preċedent li jistgħu jsostnu reformi u investimenti fl-Istati Membri skont il-Pilastru Ewropew tad-Drittijiet Soċjali. B’mod partikolari, il-Fond Soċjali Ewropew+ b’ EUR 99.3 biljun, ser ikompli jkun l-istrument prinċipali tal-UE biex isostni l-implimentazzjoni tal-Pilastru Ewropew tad-Drittijiet Soċjali u biex jikseb it-tliet miri ewlenin tal-UE għall-2030.