Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Summaries of EU Legislation

Ħin tas-sewqan u perjodi ta’ mistrieħ fis-settur tat-trasport bit-triq

 

SOMMARJU TA’:

Ir-Regolament (KE) Nru 561/2006) dwar il-ħinijiet tas-sewqan, pawżi u perjodi ta’ mistrieħ

Ir-Regolament (UE) Nru 165/2014 dwar takografi fit-trasport bit-triq

X’INHU L-GĦAN TAR-REGOLAMENTI?

  • Ir-Regolament (KE) Nru 561/2006, kif emendat bir-Regolament (EU) 2020/1054, jistabbilixxi regoli għall-ħinijiet tas-sewqan, pawżi u perjodi ta’ mistrieħ għas-sewwieqa ta’ trakkijiet, kowċijiet u xarabankijiet sabiex jittejbu l-kundizzjonijiet tax-xogħol u s-sikurezza fit-toroq.
  • Ir-Regolament (UE) Nru 165/2014, kif emendat bir-Regolament (UE) 2020/1054, jistabbilixxi rekwiżiti li jikkonċernaw il-kostruzzjoni, l-installazzjoni, l-użu, l-ittestjar u l-kontroll ta’ takografi li jridu jitwaħħlu fil-vetturi li jaqgħu fil-kamp ta’ applikazzjoni tar-Regolament (KE) Nru 561/2006.

PUNTI EWLENIN

Ir-Regolament (KE) Nru 561/2006:

  • japplika għat-trasport ta’ merkanzija bit-triq, b’vetturi b’massa totali ta’ aktar minn 3.5 tunnellati u għat-trasport bit-triq ta’ passiġġieri, b’vetturi li huma adattati sabiex iġorru aktar minn disgħa persuni (inkluż is-sewwieq);
  • mill-1 ta’ Lulju 2026, japplika għat-trasport ta’ merkanzija bit-triq fit-trasport internazzjonali jew f’operazzjonijiet ta’ kabotaġġ b’vetturi (inkluż kwalunkwe trejler jew semitrejler) b’massa totali li taqbeż 2.5 tunnellati;
  • japplika, irrispettivament mill-pajjiż ta’ reġistrazzjoni tal-vettura, għat-trasport bit-triq fl-Unjoni Ewropea (UE) u bejn l-Istati Membri tal-UE, l-Iżvizzera u l-pajjiżi taż-Żona Ekonomika Ewropea.

Età minima

L-assistenti tax-xufiera u l-kondutturi jrid ikollhom tal-inqas 18-il sena, għajr f’ċerti ċirkostanzi għall-assistenti tax-xufiera li qed jitħarrġu, għal min l-età minima hija ta’ 16-il sena (ara l-Artikolu 5 għal aktar dettalji).

Regoli dwar il-ħinijiet tas-sewqan, pawżi u perjodi ta’ mistrieħ

Regoli dettaljati għal dawn huma stabbiliti fl-Artikoli 6, 7, 8, 8a u 9.

  • Dawn ir-regoli jinkludu:
    • ammont massimu ta’ 9 sigħat għal ħin tas-sewqan ta’ kuljum, li jista’ jiġi estiż għal 10 sigħat mhux aktar minn darbtejn fil-ġimgħa;
    • ammont massimu ta’ 56 siegħa għal ħin tas-sewqan fil-ġimgħa;
    • total massimu akkumulat ta’ 90 siegħa għal ħin tas-sewqan matul kwalunkwe ġimagħtejn konsekuttivi;
    • wara sewqan għal perjodu ta’ 4.5 sigħat, sewwieq irid jieħu pawża mhux interrotta ta’ mhux inqas minn 45 minuta, sakemm ma jiħux perjodu ta’ mistrieħ;
    • pawża minima ta’ 11-il siegħa kuljum, li tista’ titnaqqas għal 9 sigħat, mhux aktar minn 3 darbiet fil-ġimgħa bejn kwalunkwe perjodi ta’ mistrieħ ta’ ġimagħtejn.
    • perjodu regolari ta’ mistrieħ ta’ mill-inqas 45 siegħa kull ġimgħa u perjodu mnaqqas ta’ mistrieħ ta’ mill-inqas 24 siegħa kull ġimgħa.
  • Il-kumpaniji tat-trasport iridu jorganizzaw ix-xogħol tas-sewwieqa b’tali mod li jħalluhom jerġgħu jmorru lura fiċ-ċentru operattiv tal-impjegatur fejn is-sewwieqa normalment ikunu bbażati fil-pajjiż tal-UE jew fil-post ta’ residenza tas-sewwieqa u jqattgħu mill-inqas perjodu wieħed regolari ta’ mistrieħ kull ġimgħa (jew perjodu ta’ mistrieħ ta’ aktar minn 45 siegħa kull ġimgħa f’kumpens għal perjodu ta’ mistrieħ imnaqqas kull ġimgħa) f’kull perjodu ta’ 4 ġimgħat konsekuttivi.
  • Is-sewwieqa għandhom ikunu jistgħu jieħdu l-mistrieħ tagħhom ta’ 45 siegħa fil-ġimgħa f’akkomodazzjoni adatta għall-ġeneri b’faċilitajiet adegwati għall-irqad u dawk sanitarji (jiġifieri lil hinn mill-kabina tal-vettura), li l-ispiża tagħhom trid titħallas mill-kumpanija tat-trasport bħala l-impjegatur.
  • Il-perjodi ta’ mistrieħ regolari u mnaqqsa tas-sewwieqa fil-ġimgħa ma għandhomx jiġu interrotti aktar minn darbtejn b’attivitajiet oħra li ma jaqbżux total ta’ siegħa, fejn dawn is-sewwieqa jakkumpanjaw vetturi li jiġu ttrasportati bil-vapur jew bil-ferrovija. Dan jgħodd biss fil-każ ta’ sewwieqa li għandhom aċċess għal kabina tal-irqad fil-vapur jew fil-ferrovija u, fil-każ ta’ mistrieħ regolari ta’ kull ġimgħa, l-interruzzjoni hija possibbli biss meta t-tul skedat tal-vjaġġ ikun ta’ 8 sigħat jew aktar.
  • Il-Kummissjoni Ewropea adottat att delegat, Regolament Delegat (UE) 2022/1012, li jistabbilixxi standards għall-livell ta’ servizz f’żoni ta’ parkeġġ sikuri u siguri għas-sewwieqa u proċeduri għaċ-ċertifikazzjoni tas-sigurtà u s-sikurezza ta’ tali żoni.

Kundizzjonijiet minimi għall-implimentazzjoni tar-regolament

  • Id-Direttiva 2006/22/KE, kif emendata bid-Direttiva (UE) 2020/1057, tistabbilixxi l-kundizzjonijiet minimi għall-implimentazzjoni tar-Regolament (KE) Nru 561/2006 u r-Regolament (UE) Nru 165/2014 (ara t-taqsima dwar it-takografi hawn taħt).
  • Din tfittex li tiżgura l-applikazzjoni xierqa u l-interpretazzjoni armonizzata tar-regoli soċjali dwar it-trasport bit-triq billi tistabbilixxi rekwiżiti minimi għall-verifika uniformi u effettiva tal-konformità mar-regoli rilevanti mill-Istati Membri. Dawk il-kontrolli għandhom iservu biex inaqqsu u jipprevjenu l-ksur.
  • Dan jirrikjedi li l-Istati Membri jintroduċu sistema ta’ klassifikazzjoni tar-riskju għall-kumpaniji tat-trasport ibbażata fuq l-għadd u l-gravità relattivi ta’ kwalunkwe ksur li tkun wettqet il-kumpanija individwali. Kumpaniji bi klassifikazzjoni ta’ riskju għoli għandhom jiġu kkontrollati aktar mill-qrib u aktar ta’ spiss.

Takografi

  • Skont ir-Regolament (UE) Nru 165/2014 (ara s-sommarju), it-takografi jridu jiġu installati fil-vetturi kollha ta’ aktar minn 3.5 tunnellati li jittrasportaw merkanzija bit-triq, u f’vetturi li jistgħu jġorru aktar minn disa’ persuni (inkluż is-sewwieq), b’ċerti eċċezzjonijiet. Mill-1 ta’ Lulju 2026, it-takografi jridu jiġu installati f’vetturi ta’ aktar minn 2.5 tunnellati involuti fit-trasport internazzjonali bit-triq jew f’operazzjonijiet ta’ kabotaġġ.
  • It-teknoloġija tat-takografi l-ewwel imxiet minn anologu għal diġitali u mbagħad minn diġitali għal diġitali aktar avvanzata, jiġifieri intelliġenti.
  • Ir-Regolament (UE) Nru 165/2014 introduċa regoli dwar takografi intelliġenti — ġenerazzjoni ġdida ta’ tagħmir abbord sabiex tiġi infurzata l-leġiżlazzjoni tal-UE dwar is-sewqan u l-ħinijiet ta’ mistrieħ tas-sewwieqa professjonali. It-takografi intelliġenti huma obbligatorji fil-vetturi l-ġodda kollha rreġistrati wara l-15 ta’ Ġunju 2019. It-takografi intelliġenti jipprovdu reġistrazzjoni awtomatizzata permezz tal-ippożizzjonar bis-satellita tal-ħin tas-sewqan, il-pawżi u l-perjodi ta’ mistrieħ, kif ukoll perjodi ta’ disponibbiltà u xogħol ieħor imwettaq minn sewwieq. Dawn għandhom itejbu l-konformità u jippermettu l-identifikazzjoni bikrija ta’ frodi jew ta’ użu ħażin possibbli.

MINN META JAPPLIKAW IR-REGOLAMENTI?

  • Ir-Regolament (KE) Nru 561/2006 ilu japplika mill-11 ta’ April 2007.
  • Ir-Regolament (UE) Nru 165/2014 ilu japplika mit-2 ta’ Marzu 2015, bl-eċċezzjonijiet elenkati fl-Artikolu 48 tiegħu.
  • Ir-Regolament (UE) 2020/1054, li emenda kemm ir-Regolament (KE) Nru 561/2006 kif ukoll ir-Regolament (UE) Nru 165/2014, ilu japplika mill-1 ta’ Awwissu 2020, għalkemm l-Artikolu 1(15) u l-Artikolu 2(12) se jibdew japplikaw mill-31 ta’ Diċembru 2024.

SFOND

Għal iktar informazzjoni ara:

DOKUMENTI PRINĊIPALI

Ir-Regolament (KE) Nru 561/2006 tal-Parlament Ewropew u tal-Kunsill tal-15 ta’ Marzu 2006 dwar l-armonizzazzjoni ta’ ċerta leġiżlazzjoni soċjali li għandha x’taqsam mat-trasport bit-triq u li jemenda r-Regolamenti tal-Kunsill (KEE) Nru 3821/85 u (KE) Nru 2135/98 u li jħassar ir-Regolament tal-Kunsill (KEE) Nru 3820/85 (ĠU L 102, 11.4.2006, p. 1-14).

L-emendi suċċessivi għar-Regolament (KE) Nru 561/2006 ġew inkorporati fit-test oriġinali. Din il-verżjoni konsolidata għandha valur dokumentarju biss.

Ir-Regolament (UE) Nru 165/2014 tal-Parlament Ewropew u tal-Kunsill tal-4 ta’ Frar 2014 dwar takografi fit-trasport bit-triq, li jħassar ir-Regolament tal-Kunsill (KEE) Nru 3821/85 dwar apparat ta’ reġistrazzjoni għat-trasport bit-triq u li jemenda r-Regolament (KE) Nru 561/2006 tal-Parlament Ewropew u tal-Kunsill dwar l-armonizzazzjoni ta’ ċerta leġiżlazzjoni soċjali li għandha x’taqsam mat-trasport bit-triq (ĠU L 60, 28.2.2014, pp. 1-33).

Ara l-verżjoni konsolidata.

DOKUMENTI RELATATI

Ir-Regolament Delegat tal-Kummissjoni (UE) 2017/1012 tas-7 ta’ April 2022 li jissupplimenta r-Regolament (UE) Nru 561/2006 tal-Parlament Ewropew u tal-Kunsill fir-rigward tal-istabbiliment ta’ standards li jispeċifikaw il-livell ta’ servizz u s-sigurtà ta’ żoni ta’ parkeġġ sikuri u siguri u fir-rigward tal-proċeduri għaċ-ċertifikazzjoni tagħhom (ĠU L 170, 28.6.2022, pp. 27-37).

Id-Direttiva 2006/22/KE tal-Parlament Ewropew u tal-Kunsill tal-15 ta’ Marzu 2006 dwar il-kondizzjonijiet minimi għall-implimentazzjoni tar-Regolamenti tal-Kunsill (KEE) Nri 3820/85 u 3821/85 dwar il-leġiżlazzjoni soċjali li għandha x’taqsam ma’ attivitajiet tat-trasport bit-triq u li tħassar id-Direttiva tal-Kunsill 88/599/KEE (ĠU L 102, 11.4.2006, pp. 35-44).

Ara l-verżjoni konsolidata.

l-aħħar aġġornament 12.09.2022

Top