Ateangaireacht
17/09/2018

A bheith ag obair mar shaor-ateangaire leis an Aontas

Tá seirbhís ateangaireachta dá gcuid féin ag Parlaimint na hEorpa, ag an gCoimisiún Eorpach agus ag Cúirt Bhreithiúnais an Aontais Eorpaigh, ach is i gcomhpháirt le chéile a roghnaíonn siad saor-ateangairí.

Bíonn saor-ateangairí ag obair i dteannta ateangairí foirne mar chuid den ghnáthobair i seirbhísí ateangaireachta an Aontais Eorpaigh, an Choimisiúin Eorpaigh agus na Cúirte Breithiúnais. Is i 24 theanga oifigiúla an Aontais a oibrímid den chuid is mó, ach níl aon teanga curtha as an áireamh; ní bhaineann aon choinníoll náisiúntachta le bheith i do shaor-ateangaire.

Chun éirí i do shaor-ateangaire, ní mór duit pas a ghnóthú i dtriail chreidiúnúcháin. Tá an t-eolas uile ar chéimeanna éagsúla an phróisis tástála le fáil anseo. Ar an bhféilire tá sé léirithe cé na trialacha creidiúnúcháin atá le teacht a bhaineann le do theanga.

1. Incháilitheacht

Ní mór ceann de na cáilíochtaí seo a leanas a bheith agat:

  • Baitsiléireacht san Ateangaireacht Chomhdhála (4 bliana)

  • Máistreacht san Ateangaireacht Chomhdhála

  • Baitsiléireacht in ábhar ar bith agus
    Dioplóma iarchéime san Ateangaireacht Chomhdhála a mhair bliain acadúil lánaimseartha amháin ar a laghad

    taithí oibre bliana amháin ar a laghad a fuair tú mar ateangaire comhdhála ar an leibhéal is gá do chruinnithe idirnáisiúnta (ní chuirfear ateangaireacht chúirte, ateangaireacht idirghabhála, ateangaireacht do sheirbhísí poiblí ná ateangaireacht do ghnólachtaí san áireamh).

2. Próifílí Teanga agus Féilire

Féach na próifílí teanga reatha atá leagtha síos ag seirbhísí ateangaireachta an Aontais. Tagann athruithe ar na próifílí sin de réir mar a athraíonn riachtanais earcaíochta.

Eagraítear trialacha de réir mar is gá, ar bhonn riachtanais earcaíochta na n-institiúidí. Foilsítear féilire táscach na dtrialacha réamhroghnúcháin agus creidiúnúcháin gach bliain ach is féidir go dtiocfaidh athruithe air.

3. Triail Réamhroghnúcháin

Má dheimhníonn Coiste um Scagadh idirinstitiúideach go bhfuil d'iarratas incháilithe agus má chomhlíonann sé ár gceanglais maidir le próifílí teanga, iarrfar ort triail réamhroghnúcháin ar líne a dhéanamh.

Is éard atá sa triail, ateangaireacht chomhuaineach ar óráid tuairim agus 10 – 12 nóiméad chuig teanga A agat. Is é an Coiste um Scagadh a roghnaíonn teanga éighníomhach do thrialach as na teangacha éighníomhacha seo a leanas: DE, EN, ES, FR nó IT.

Is féidir leat an triail a dhéanamh nuair a gheobhaidh tú an cuireadh tríd an ríomhphost, ar choinníoll nach mbeidh an sprioc-am thart (i.e. an tréimhse thástála). Is féidir leat an triail a dhéanamh cibé am is mian leat, ar choinníoll go bhfuil do ghléas in ann ag na riachtanais theicniúla uile. Sin an fáth a bhfuil sé tábhachtach grinnscrúdú a dhéanamh ar an treoir d'úsáideoirí maidir le huirlisí trialacha.

Gheobhaidh tú na torthaí a ghnóthaigh tú sna trialacha ó fhoireann tástála Pharlaimint na hEorpa i ndeireadh na tréimhse meastóireachta.

4. Triail Chreidiúnúcháin

Má éiríonn an triail réamhroghnúcháin leat, is féidir go dtabharfar cuireadh duit an triail chreidiúnúcháin a dhéanamh, de réir ár n-acmhainne tástála agus riachtanais na seirbhíse.

I gcás gach teanga a thástálfar, beidh an méid seo a leanas ina chuid den triail chreidiúnúcháin:

  • Ateangaireacht leantach ar óráid (± 6 nóiméad)

  • Ateangaireacht chomhuaineach ar óráid (± 10–12 nóiméad)

Tástálfar an ateangaireacht a dhéanfaidh tú ó do theangacha éighníomhacha chuig do theanga ghníomhach agus/nó a mhalairt, de réir na dteangacha i do phróifíl a roghnaigh an Coiste um Scagadh agus de réir riachtanais na seirbhíse.

Beidh ceann amháin ar a laghad de na hóráidí bunaithe ar ábhar a bhaineann leis an Aontas. Féadfar fístaifid d'óráidí a úsáid le haghaidh na dtrialacha comhuaineacha.

Is sa Bhruiséil a dhéantar an triail chreidiúnúcháin. Féach an féilire chun a fháil amach cén uair a bheidh do theanga á tástáil.

Déanfaidh an bord roghnúcháin meastóireacht ar an ateangaireacht uait ar bhonn na gcritéar marcála; cuirfidh sé an toradh in iúl duit i ndiaidh na trialach agus gheobhaidh tú deimhniú i scríbhinn air ina dhiaidh sin.

Má tugadh cuireadh duit triail chreidiúnúcháin a dhéanamh, léigh na leideanna a bhaineann léi.

5. An bunachar sonraí comhpháirteach

Déantar sonraí na n-iarrthóirí ar éirigh an triail chreidiúnúcháin leo a iontráil i mbunachar sonraí na nGníomhairí Ateangaireachta Comhdhála (ACIanna) agus féadfar iad a earcú trí sheirbhís ateangaireachta an Aontais Eorpaigh.

Ní hionann d'ainm a bheith sa bhunachar sonraí agus ceart a bheith agat post a fháil.

6. Déan iarratas!

Ó tá deireadh eolais anois agat ar na céimeanna éagsúla, líon isteach an t-iarratas ar líne.

Iarrfar ort na nithe seo a leanas a thabhairt:

  • do CV;

  • teastais chéime agus/nó dioplómaí ina bhfuil na marcanna a ghnóthaigh tú i ngach cuid a bhain le hateangaireacht;

  • má bhaineann sé le hábhar, cruthúnas go bhfuil do dhóthain taithí agat ar an ateangaireacht chomhdhála (ní chuirfear ateangaireacht chúirte, ateangaireacht idirghabhála, ateangaireacht do sheirbhísí poiblí ná ateangaireacht do ghnólachtaí san áireamh);

  • i gcás teangacha nach bhfuil luaite sna céimeanna nó sna dioplómaí, ba cheart fianaise a thabhairt maidir le conas a chuir tú eolas orthu (teastas nó ráiteas pearsanta, mar shampla).

Nuair a bheidh sin déanta agat, cuirfear admháil chugat go bhfuarthas an fhianaise.

Is féidir leat iarratas a dhéanamh tráth ar bith, ach molaimid duit na sprioc-amanna sonracha de réir teanga A a sheiceáil ar an bhféilire trialacha táscach.

Ceisteanna Coitianta

Doiciméid úsáideacha

Doiciméid dlí agus airgeadais

Tá tosaíocht ag an leagan Fraincise ar gach teanga eile. Is amhlaidh sin toisc gurb é leagan Fraincise a shíníonn gach páirtí.

Le haghaidh iarrthóirí ACI dár tugadh cuireadh triail chreidiúnúcháin a dhéanamh: ranníocaíocht le haghaidh caiteachas taistil agus cothabhála