Din il-paġna hija disponibbli fi 23 lingwa
Tipi ta' impjiegi
Hemm għadd ta' modi kif in-nies jistgħu jidħlu jaħdmu mal-Istituzzjonijiet. Hawn taħt issib deskrizzjoni tal-kategoriji differenti ta' staff li jistgħu jaħdmu fl-Istituzzjonijiet tal-UE.
Għal aktar tagħrif dwar kif tapplika għal dawn l-opportunitajiet differenti iċċekkjaw il-paġni dwar kif tapplika.
aqra iktar dwar dan
Uffiċjali permanenti
L-uffiċjali permanenti jiffurmaw is-Servizz Ċivili tal-UE u huma maqsuma f’żewġ kategoriji – amministraturi (AD) u assistenti (AST).
L-Amministraturi normalment ikunu inkarigati bl-abbozzar ta' politiki u l-implimentar tal-liġi Ewropea kif ukoll b'xogħol ta' analiżi u konsultazzjoni. Amministratur jista' jsib ruħu fi rwol importanti fil-proċess leġiżlattiv u baġitarju tal-UE, jikkoordina l-politiki ekonomiċi jew ta' xorta oħra tal-Istati Membri, jieħu parti fin-negozjati kummerċjali ma' pajjiżi barra mill-UE, jew jirrappreżenta lill-Istituzzjonijiet f'forums internazzjonali. Oħrajn jistgħu jkunu qed jispezzjonaw il-flotot tas-sajd fl-Istati Membri, l-iżvilupp jew it-tmexxija ta' xi programm speċifiku ta' riċerka xjentifika, jew jabbozzaw deċiżjoni tal-Qorti Ewropea tal-Ġustizzja jew tal-Ombudsman Ewropew. Aħna noffru firxa tassew wiesgħa f'dawk li huma opportunitajiet ta' karriera għall-iggradwati universitarji inklużi fis-setturi tal-amministrazzjoni, il-liġi, il-finanzi, l-ekonomija, il-komunikazzjoni u x-xjenza biex insemmu ftit minnhom.
L-Assistenti ġeneralment ikunu impjegati fi rwol ta' appoġġ (segretarjali, amministrattiv, finanzjarju, komunikattiv, implimentattiv, ta' żvilupp politiku, eċċ). Jagħtu sehem importanti fit-tmexxija interna tal-Istituzzjonijiet, l-aktar fl-affarijiet finanzjarji u baġitarji, xogħol relatat mal-istaff, bil-kompjuters, u ta' tmexxija tad-dokumenti.
Staff b'kuntratt
L-istaff b'kuntratt (CAST) jiġu inkarigati jagħmlu xogħol manwali jew ħidma ta' servizz ta' għajnuna amministrattiva jew jipprovdu aktar kapaċità f'oqsma speċjalizzati fejn ma jkunx hemm uffiċjali biżżejjed bil-kapaċitajiet speċjalizzati meħtieġa. L-istaff b'kuntratt jiġu impjegati għal perjodu massimu fiss, bosta drabi b'kuntratti inizjali iqsar ta' 6-12-il xahar, skont it-tip ta' xogħol.
Jeżistu pożizzjonijiet għal staff b'kuntratt f'firxa kbira ta' xogħlijiet, li jirrekjedu livelli differenti ta' kwalifiki. Jinqasmu f'erba' gruppi funzjonali:
- xogħol manwali jew ħidma ta' servizz ta' għajnuna amministrattiva
- xogħol klerikali jew segretarjali, tmexxija tal-uffiċċju u xogħol ta' dan it-tip
- xogħol eżekuttiv, abbozzar, kontabilità u dan it-tip ta' xogħol tekniku
- xogħol amministrattiv, konsultattiv, lingwistiku u ta' din ix-xorta.
Aġenti Temporanji (Ħaddiem Mhux Permanenti)
L-aġenti temporanji jistgħu jiġu impjegati biex jagħmlu varjetà kbira ta’ xogħol speċjalizzat jew temporanju għal perjodu massimu ta’ sitt snin.
Staff Interim
Xi Istituzzjonijiet jimpjegaw ukoll staff lokali għal perjodu qasir u fuq bażi temporanja (sa 6 xhur), permezz ta' aġenziji tax-xogħol temporanju.
Apprendisti
'Il fuq minn 1,200 żagħżugħ u żagħżugħa fis-sena jkollhom l-opportunità jtejbu l-kapaċitajiet professjonali tagħhom, jiżviluppaw il-kwalitajiet personali u jżidu l-għarfien tagħhom dwar l-UE permezz tal-programmi ta' apprendistat. Il-Parlament Ewropew, il-Kunsill, il-Kummissjoni, il-Qorti tal-Ġustizzja, il-Kumitat Ekonomiku u Soċjali, il-Kumitat tar-Reġjuni u l-Ombudsman Ewropew jorganizzaw apprendistati għall-gradwiti żgħażagħ. Kull wieħed idum bejn 3 u 5 xhur. L-apprendisti kollha jkunu lestew l-ewwel kors universitarju biex b'hekk ikunu jistgħu jagħmlu xogħol bħal dak li jagħmlu l-uffiċjali bi grad aktar baxx minn AD.
Esperti Nazzjonali Sekondati (ENS)
L-ENS huma impjegati taċ-ċivil nazzjonali jew internazzjonali jew persuni impjegati fis-settur pubbliku li jaħdmu għal xi żmien ma’ Istituzzjoni tal-UE. Iġibu l-esperjenzi fl-Istituzzjoni dwar kwistjonijiet li jkunu mdorrijin bihom, u jieħdu lura magħhom għarfien dwar il-politiki u l-proċeduri tal-UE li jkunu kisbu waqt il-perjodu ssekondat.
