Baill foirne TFC

Cuireann córais ríomhaireachta, atá á gcothabháil ag baill foirne tacaíochta TFC, ar chumas institiúidí an AE obair a dhéanamh a théann i bhfeidhm ar 500 milliún duine i 27 tír an AE.
Féadfaidh na nithe seo a leanas a bheith i gceist lena bheith ag obair le táirgí agus le próisis TFC sa timpeallacht dhúshlánach ilteangach seo:

bainistíocht tionscadal agus próiseas
monatóireacht agus anailís
anailís theicniúil agus comhairle
Comhordú agus comhairliúchán idir seirbhísí
seirbhísí teileachumarsáide
ionaid phróiseála sonraí
bainistiú agus maoirseacht a dhéanamh ar sheirbhísí ríomhphoist, agus ar sheirbhísí líonra sonraí agus gutha
forbairt Ghréasáin
bogearraí le haghaidh bhailiú sonraí staidrimh a fhorbairt
bainistiú slándála TF.

Féadfar foireann ar conradh a fhostú chomh maith chun obair sa réimse TF agus teileachumarsáide.

Cáilíochtaí (táscacha)

Ní mór na nithe seo a leanas a bheith agat:

eolas maith ar 2 theanga Eorpacha ar a laghad (ní mór Béarla, Fraincis nó Gearmáinis a bheith ar cheann amháin de na teangacha sin)
céim nó cáilíocht iarchéime i dteicneolaíocht faisnéise agus cumarsáide, (nó céim a bheith le baint amach agat i mbliana) le haghaidh iontrála ag Grád AD 5
taithí iomchuí roinnt blianta, chun post a ghlacadh linn ar leibhéal níos sinsearaí (Grád AD 7).

Ní mór na nithe seo a leanas a bheith agat chun post a ghlacadh ar Ghrád AST 3 (cúntóir):

eolas maith ar 2 theanga Eorpacha ar a laghad (ní mór Béarla, Fraincis nó Gearmáinis a bheith ar cheann amháin de na teangacha sin)
- oideachas iar-dara leibhéal agus taithí ghairmiúil ábhartha 3 bliana ar a laghad, nó
- oideachas dara leibhéal agus taithí ghairmiúil ábhartha 6 bliana ar a laghad

Féadfaidh na ceanglais maidir le foireann ar conradh a bheith difriúil.

Nós imeachta roghnúcháin – conarthaí buana

Tar éis duit iarratas a dhéanamh ar líne, tabharfaimid cuireadh duit triail ilroghnach a dhéanamh maidir le do chuid réasúnaíochta briathartha, uimhriúla agus teibí agus do bhreithiúnas suíomhúil. Déanfar scileanna gairmiúla iarrthóirí ar phoist cúntóra a thástáil maidir le cruinneas agus beachtas agus cinneadh tosaíochtaí agus eagrúchán freisin.
Má éiríonn leat, tabharfar cuireadh duit chuig ionad measúnaithe sa Bhruiséil[ní amhlaidh a bheidh i gcás baill foirne ar conradh - féach ar Roghnú ball foirne ar conradh] áit ar féidir linn bualadh leat agus níos mó a fháil amach faoi do chuid scileanna maidir leo seo a leanas:

anailís agus réiteach fadhbanna
cumarsáid
cáilíocht agus torthaí maidir le seachadadh
scileanna foghlama agus forbartha
cinneadh tosaíochtaí agus eagrúchán
solúbthacht
oibriú i bhfoireann
ceannaireacht (i gcás post ar leibhéal AD amháin).

Déanfar iad seo a mheasúnú ar bhonn cás-staidéar, gníomhaíochtaí i ngrúpaí, agus agallamh struchtúrtha. Beidh ar iarrthóirí ar phoist riarthóra cur i láthair ó bhéal a dhéanamh freisin. Beidh ar iarrthóirí ar phoist chúntóra cleachtadh tráidire isteach a dhéanamh.

Níos mó faoin nós imeachta roghnúcháin:
Conarthaí buana
Baill foirne ar conradh

Barr an leathanaigh