Daqs u popolazzjoni
L-UE tkopri aktar minn 4 miljun km² u għandha 495 miljun abitant — it-tielet l-akbar popolazzjoni fid-dinja wara ċ-Ċina u l-Indja. Fuq il-bażi tal-erja tal-wiċċ, Franza hi l-akbar pajjiż tal-UE u Malta l-iżgħar.
Il-popolazzjoni 
tal-Ewropa qed tiżdied minħabba kombinazzjoni ta’ tkabbir naturali (iżjed nies qegħdin jitwieldu kull sena milli qegħdin imutu) u migrazzjoni netta (iżjed nies qegħdin jissettiljaw fl-UE milli jitilqu minnha).
Fl-istess ħin, il-popolazzjoni tal-Ewropa qed tixjieħ hekk kif l-istennija tal-ħajja qed tiżdied u inqas tfal qed jitwieldu.
Kwalità tal-ħajja
L-istandards tal-għajxien jistgħu jiġu mqabbla billi jitkejjel il-prezz ta’ firxa ta’ prodotti u servizzi f’kull pajjiż b’mod relattiv għad-dħul, bl-użu ta’ munita nazzjonali komuni msejħa l-istandard tas-setgħa tax-xiri (PPS). It-tqabbil tal-PGD għal kull abitant fil-PPS jipprovdi ħarsa ġenerali tal-istandards tal-ħajja fl-UE.
L-UE tagħmel l-almu tagħha biex ittejjeb l-istandards tal-ħajja billi tipproteġi l-ambjent, tinkoraġġixxi l-ħolqien tal-impjiegi, tnaqqas id-differenzi reġjonali u tikkonnettja oqsma li qabel kienu iżolati billi tiżviluppa infrastruttura transkonfinali.
Edukazzjoni
L-edukazzjoni żżid il-ħiliet tal-forza tax-xogħol u tpoġġihom f’pożizzjoni aħjar biex ilaħħqu mal-kompetizzjoni internazzjonali li dejjem qed tiżdied. L-ammont ta’ flus li kull pajjiż jonfoq fuq l-edukazzjoni jvarja.
Infiq pubbliku fuq l-edukazzjoni
L-UE tinkoraġġixxi lin-nies biex iqattgħu xi żmien barra l-pajjiż bħala parti mill-edukazzjoni tagħhom. Il-programm Erasmus għal skambji ta’ studenti kien partikolarment suċċess.
Lingwi
Il-ħiliet tal-lingwi qed isiru dejjem iżjed importanti, peress li l-globalizzazzjoni twassal għal dejjem iżjed kuntatt ma’ nies minn pajjiżi oħra. L-UE b’mod attiv tinkoraġġixxi l-kisba ta’ ħiliet ta’ lingwi sa minn età żgħira.
Attitudni lejn l-UE
Ħafna nies jemmnu li s-sħubija fl-UE hi ħaġa tajba għall-pajjiż tagħhom u li kien hemm benefiċċji tanġibbli mis-sħubija. Madankollu, hemm differenzi kbar bejn il-pajjiżi, b’uħud iżjed entużjastiċi minn oħrajn.
