Sena Ewropea – kull sena mill-1983 'l hawn
L-ewwel Sena Ewropea, fl-1983, kienet iddedikata għan-negozji ż-żgħar ("l-SMEs") u għall-industrija tas-snajja’. Minn dakinhar 'l hawn, kull sena l-UE għażlet suġġett speċifiku biex tħeġġeġ għal dibattitu u djalogu fil-pajjiżi Ewropej u bejniethom.
Għaliex jiġu ċċelebrati s-Snin Ewropej?
L-għan hu li n-nies isiru jafu aktar dwar ċerti temi, li jiġi inkuraġġit id-dibattitu u li jinbidlu l-attitudnijiet. Matul bosta mis-Snin Ewropej, jiġi pprovdut finanzjament aktar mis-soltu għal proġetti lokali, nazzjonali u transfruntieri li jindirizzaw it-tema speċifika tas-Sena.
Is-Sena Ewropea tista’ wkoll tibgħat messaġġ ta' impenn qawwi u tagħti sinjal politiku min-naħa tal-Istituzzjonijiet tal-UE u tal-gvernijiet tal-Istati Membri li jkunu se jagħtu kas ta' dik it-tema waqt it-tfassil tal-politiki fil-futur. F’xi każijiet, il-Kummissjoni Ewropea tista’ tipproponi leġiżlazzjoni ġdida b'rabta mat-tema.
Kif tintgħażel it-tema tas-Sena Ewropea?
Tiġi proposta mill-Kummissjoni u mbagħad tiġi adottata mill-Parlament Ewropew u mill-gvernijiet tal-Istati Membri tal-UE.
It-temi jintgħażlu diversi snin bil-quddiem. Dejjem ikunu ta' interess ġenerali u ta' importanza kbira kemm għall-istituzzjonijiet tal-UE kif ukoll għall-pajjiżi membri. Il-gvernijiet tal-Istati Membri, is-soċjetà ċivili, in-negozji, jew kwalunkwe partijiet interessati oħrajn jistgħu jissuġġerixxu temi lill-Kummissjoni.
Lista tas-Snin Ewropej
- 2013 - Is-Sena Ewropea taċ-Ċittadini
- 2012 - Is-Sena Ewropea għat-Tixjiħ Attiv
- 2011 - Is-Sena Ewropea tal-Volontarjat
- 2010 - is-Sena Ewropea għall-Ġlieda kontra l-Faqar u l-Esklużjoni Soċjali
- 2009 - is-sena Ewropea tal-Kreattività u l-Innovazzjoni
- 2008 - Is-Sena Ewropea tad-Djalogu Interkulturali
- 2007 - Is-Sena Ewropea tal-Opportunitajiet Indaqs għal Kulħadd
- 2006 - Is-Sena Ewropea għall-Mobilità tal-Ħaddiema
- 2005 - Is-Sena Ewropea taċ-Ċittadinanza permezz tal-Edukazzjoni
- 2004 - Is-Sena Ewropea tal-Edukazzjoni permezz tal-Isport
- 2003 - Is-Sena Ewropea tal-Persuni b’Diżabbiltajiet
- 2001 - Is-Sena Ewropea tal-Lingwi
- 1999 - Is-Sena Ewropea tal-Azzjoni biex tiġi Miġġielda l-Vjolenza Kontra n-Nisa
- 1998 - Is-Sena Ewropea tad-Demokrazija Lokali u Reġjonali
- 1997 - Is-Sena Ewropea kontra r-Razziżmu u l-Ksenofobija
- 1996 - Is-Sena Ewropea tal-Edukazzjoni Tul il-Ħajja
- 1995 - Is-Sena Ewropea tas-Sikurezza fit-Toroq u tas-Sewwieqa Żgħażagħ
- 1994 - Is-Sena Ewropea tan-Nutrizzjoni u s-Saħħa
- 1993 - Is-Sena Ewropea tal-Anzjani u tas-Solidarjetà bejn il-Ġenerazzjonijiet
- 1992 - Is-Sena Ewropea tas-Sikurezza, l-Iġene u l-Protezzjoni tas-Saħħa fil-Postijiet tax-Xogħol
- 1990 - Is-Sena Ewropea tat-Turiżmu
- 1989 – Is-Sena Ewropea tal-Informazzjoni dwar il-Kanċer
- 1988 - Is-Sena Ewropea taċ-Ċinema u tat-Televiżjoni
- 1987 - Is-Sena Ewropea tal-Ambjent
- 1986 - Is-Sena Ewropea tas-Sikurezza fit-Toroq
- 1985 - Is-Sena Ewropea tal-Mużika
- 1984 - Is-Sena Ewropea għal Ewropa tal-Poplu
- 1983 - Is-Sena Ewropea tal-SMEs u tal-Industrija tas-Snajja'
