Bliain Eorpach - ceann ann gach bliain ó 1983 i leith
Bhí an chéad Bhliain Eorpach, i 1983, dírithe ar fhiontair bheaga agus mheánmhéide (FBManna) agus ar an gceardtionscal. Gach bliain ó shin i leith, tá ábhar ar leith roghnaithe ag an AE chun díospóireacht agus idirphlé sna tíortha Eorpacha, agus eatarthu, a spreagadh.
Cad chuige na Blianta Eorpacha?
Tá siad dírithe ar fheasacht a ardú i leith ábhar áirithe, ar dhíospóireachtaí a spreagadh agus ar dhearcthaí daoine a athrú. Le linn roinnt mhaith de na blianta Eorpacha seo, déantar maoiniú breise a chur ar fáil le haghaidh tionscadal áitiúil, náisiúnta agus trasteorann atá dírithe ar ábhar speisialta na Bliana sin.
Féadfar an Bhliain Eorpach a úsáid freisin le comhartha láidir polaitiúil agus le tiomantas a léiriú ó thaobh institiúidí an AE agus rialtais na mBallstát de go gcuirfear an t-ábhar sin san áireamh i ndéanamh beartas amach anseo. I gcásanna ar leith, féadfaidh an Coimisiún Eorpach reachtaíocht nua a mholadh ar an téama sin.
Conas a roghnaítear téama don Bhliain Eorpach?
Is é an Coimisiún a mholann an téama agus glacann Parlaimint na hEorpa agus rialtais Bhallstáit an AE é.
Roghnaítear na téamaí cúpla bliain roimh ré. Téamaí iad a bhíonn ina n-ábhar imní d'institiúidí an AE agus do na Ballstáit ach a gcuireann siad suim ghinearálta iontu freisin. Féadfaidh rialtais na mBallstát, an tsochaí shibhialta, gnólachtaí nó geallsealbhóirí ar bith eile ábhair a chuir faoi bhráid an Choimisiúin.
Liosta na mBlianta Eorpacha
- 2013 - Bliain Eorpach na Saoránach
- 2012 - An Bhliain Eorpach um Aosú Gníomhach
- 2011 - Bliain Eorpach na hOibre Deonaí
- 2010 - An Bhliain Eorpach chun an Bhochtaineacht agus an tEisiamh Sóisialta a Chomhrac
- 2009 - Bliain Eorpach na Cruthaitheachta agus na Nuálaíochta
- 2008 - Bliain Eorpach an Chomhphlé Idirchultúrtha
- 2007 - An Bhliain Eorpach um Chomhdheiseanna do Chách
- 2006 - An Bhliain Eorpach um Shoghluaisteacht an Lucht Saothair
- 2005 - Bliain Eorpach na Saoránachta trí Oideachas
- 2004 - Bliain Eorpach an Oideachais trí Spórt
- 2003 - Bliain Eorpach Daoine faoi Mhíchumas
- 2001 - Bliain Eorpach na dTeangacha
- 1999 - Bliain Eorpach Gníomhaíochta chun Foréigean in aghaidh na mBan a chomhrac
- 1998 - Bliain Eorpach an Daonlathais Áitiúil agus Réigiúnaigh
- 1997 - An Bhliain Eorpach in aghaidh an Chiníochais agus na Seineafóibe
- 1996 - Bliain Eorpach um Fhoghlaim ar Feadh an tSaoil
- 1995 - Bliain Eorpach um Shábháilteacht ar Bhóithre agus um Thiománaithe Óga
- 1994 - Bliain Eorpach um Chothú agus Sláinte
- 1993 - Bliain Eorpach na nDaoine Scothaosta agus na Dlúthpháirtíochta idir na Glúine
- 1992 - Bliain Eorpach um Shábháilteacht, Sláinteachas agus Cosaint Sláinte ar an Láthair Oibre
- 1990 - Bliain Eorpach na Turasóireachta
- 1989 - Bliain Eorpach na Faisnéise faoi Ailse
- 1988 - Bliain Eorpach um an bPictiúrlann agus an Teilifís
- 1987 - Bliain Eorpach an Chomhshaoil
- 1986 - Bliain Eorpach um Shábháilteacht ar Bhóithre
- 1985 - Bliain Eorpach an Cheoil
- 1984 - Bliain Eorpach ar son Eoraip na nDaoine
- 1983 - Bliain Eorpach na FBManna agus an Cheardtionscail
