You are here:

An Oifig Chomhphobail um Chineálacha Plandaí (CPVO)

Achoimre

Is é a dhéanann an Oifig Chomhphobail um Chineálacha Plandaí (CPVO) an nuálaíocht i gcineálacha plandaí a spreagadh trí iarratais ar chearta Comhphobail i ndáil le cineálacha plandaí a phróiseáil go cúramach ar chostas réasúnta, agus tugann baill foirne na hOifige treoir maidir le cúrsaí beartais agus cúnamh do pháirtithe leasmhara maidir leis na cearta sin a fheidhmiú. Trí chineálacha nua plandaí a chosaint ar fud an Aontais Eorpaigh, caomhnaítear leasanna na bpóraitheoirí agus féachtar chuige go mbeidh brabús le fáil acu ar a gcuid infheistíochta i dtaighde agus i nuálaíocht.

Cad é go díreach a dhéanann CPVO?

  • Bronnann CPVO cearta maoine intleachtúla i leith cineálacha nua plandaí. Bíonn na cearta sin bailí ar feadh tréimhse 25 bliana (nó ar feadh 30 bliain i gcás cineálacha áirithe prátaí, fíniúnacha agus crann) i mBallstáit uile an Aontais Eorpaigh.
  • Treoir maidir le cúrsaí beartais agus cúnamh a thabhairt do pháirtithe leasmhara maidir leis na cearta sin a fheidhmiú.

Struchtúr

Tá Oifig an Uachtaráin cuntasach do Chomhairle Riaracháin ar a bhfuil:

  • ionadaithe as na 28 mBallstát
  • ionadaithe ón gCoimisiún Eorpach
  • breathnadóirí.

Is gníomhaireacht féinmhaoinithe de chuid an Aontais Eorpaigh í an Oifig agus is í an Chomhairle Riaracháin an t-údarás buiséadach atá aici. Seo roinnt de na cúraimí atá uirthi:

  • teacht le chéile uair sa bhliain ar a laghad chun an clár oibre agus an buiséad bliantúil a phlé agus a ghlacadh
  • faireachán a dhéanamh ar obair na hOifige
  • cúram na scrúduithe teicniúla a tharmligean chuig na hoifigí náisiúnta scrúdaithe, thar cheann na hOifige
  • prótacail theicniúla a cheadú maidir le cineálacha plandaí a thástáil.

Tá trí aonad (aonad riaracháin, aonad teicniúil agus aonad dlí) agus seirbhísí tacaíochta san Oifig.

Cén chaoi a n-oibríonn an Oifig Chomhphobail um Chineálacha Plandaí?

Tá an córas Eorpach um chearta cineálacha plandaí ar an gcóras is forleithne dá leithéid atá ann ar domhan. Ó 1995 i leith, tá os cionn 53,000 iarratas próiseáilte aige agus os cionn 41,000 ceart Comhphobail bronnta aige i leith cineálacha plandaí. Léiríonn an méid sin an tóir atá ag póraitheoirí plandaí ar an gcóras, póraitheoirí atá ag iarraidh a gcineálacha plandaí a chur ar an margadh ar fud na hEorpa.

Bíonn dlúthchaidreamh idir an Oifig agus:

  • an Ard-Stiúrthóireacht um Shláinte agus Sábháilteacht Bia sa Choimisiún Eorpach (DG SANTE)
  • rialtais náisiúnta na mBallstát
  • na hoifigí náisiúnta scrúdaithe ar fud na hEorpa
  • cumainn póraitheoirí: ESA, CIOPORA, Plantum
  • an tAontas Idirnáisiúnta um Chosaint Cineálacha Nua Plandaí (UPOV)
  • an Oifig um Chomhchuibhiú sa Mhargadh Inmheánach (Trádmharcanna agus Dearaí)
  • Oifig Eorpach na bPaitinní (OEP)
  • dlíodóirí maoine intleachtúla agus ollscoileanna.

Cé a bhainfidh leas as?

Seo na príomhghrúpaí:

  • póraitheoirí plandaí
  • saothróirí
  • an pobal i gcoitinne.
An Oifig Chomhphobail um Chineálacha Plandaí

Sonraí teagmhála

Seoladh

3 boulevard Maréchal Foch

F–49101 Angers Cedex 02

France

Teileafón
+33 2 41 25 64 00
Facs
+33 2 41 25 64 10
Líonraí sóisialta