Biex tibqa' f'saħħtek

Aċċess għall-kura tas-saħħa

Jekk int ċittadin tal-UE tista' tingħata kura medika b'xejn jew bi prezz imnaqqas jekk timrad għal għarrieda jew jinqalagħlek inċident waqt żjara temporanja f'xi pajjiż tal-UE, l-Iżlanda, il-Liechtenstein, in-Norveġja jew l-Iżvizzera. Din l-iskema tkopri biss il-kura tas-saħħa ffinanzjata mill-gvern, u kull pajjiż għandu r-regoli tiegħu għal provvista medika pubblika. F'ċerti pajjiżi din hija b'xejn, f'oħrajn inti tħallas parti mill-ispejjeż, f'oħrajn trid tħallas l-ispejjeż kollha, imbagħad titlob rimborż. Għalhekk żomm il-kontijiet, ir-riċetti u l-irċevuti.

Karta tal-assigurazzjoni Ewropea tissimplifika l-proċeduri, tnaqqas il-burokrazija u tħeffef ir-rimborż tal-ispejjeż. Jekk għad m'għandekx din il-karta, iksibha mill-uffiċju tas-sigurtà soċjali jew tal-assigurazzjoni tal-mard. Xi pajjiżi jinkorporaw il-karta Ewropea fuq in-naħa ta' wara tal-karta nazzjonali u oħrajn joħorġu karti separati.

Assigurazzjoni tal-ivvjaġġar

Ikun tajjeb li tagħmel assigurazzjoni tal-ivvjaġġar minħabba li ftit huma l-pajjiżi tal-UE li jħallsu l-ispejjeż kollha tal-kura medika. Il-mard jew xi inċident barra minn pajjiżek jistgħu jfissru aktar spejjeż għal vjaġġi, akkomodazzjoni u biex tmur lura lejn pajjiżek, u jista' jkollok bżonn tkun assigurat kontrihom.

Mediċini

Ħu r-riċetta miegħek jekk tkun qed iġġorr mediċini li jinxtraw biha. Iġġorrx miegħek kwantitajiet akbar milli jkollok bżonn għalik innifsek waqt il-vjaġġ, għax kwantitajiet kbar ta' mediċini jistgħu jqajmu suspett.

It-tilqim

B'mod ġenerali, ma hemm l-ebda obbligu li titlaqqam meta ssiefer fl-UE. Madankollu hemm xi rekwiżiti jew rakkomandazzjonijiet għal ċerti territorji mbiegħda tal-UE. Qabel ma żżur dawn it-territorji, iċċekkja mat-tabib tiegħek jew mur fis-sit internet tal-Organizzazzjoni Dinjija tas-Saħħa.

L-ilma tal-għawm

Hemm livelli stretti dwar l-ilma fejn jista' jsir l-għawn madwar l-UE kollha. Rapport Annwali tal-Kummissjoni Ewropea jagħti tagħrif utli dwar il-kwalità tal-ilma għal dawk li jkunu sejrin vaganza kemm tul il-kosta kif ukoll fl-ilmijiet ta' ġewwa. Teżisti wkoll mappa interattiva   fejn tista' tara l-istat tal-ilmijiet fl-UE kollha.

Jekk tara Bandiera Kaħla f’bajja jew f’marina, tista’ sserraħ rasek li l-istandards speċifiċi fuq is-sigurtà u l-kwalità tal-ilma, is-servizzi, il-ġestjoni ambjentali u l-informazzjoni jkunu ntlaħqu. Iktar minn 2 850 bajja u marina fl-UE ġew ippremjati bil-Bandiera Kaħla fl-2008. Din l-iskema volontarja qed titmexxa mill-Fondazzjoni għall-Edukazzjoni Ambjentali.

Aktar dettalji tal-pajjiżi parteċipanti u s-siti b'Bandiera Kaħla .

Prodotti kontra r-raġġi tax-xemx

L-għażla tal-prodott it-tajjeb kontra x-xemx li tieħu miegħek fil-vakanzi qed issir aktar faċli minħabba r-rakkomandazzjonijiet tal-UE dwar it-tikkettar aktar ċar. Uża prodott li jipproteġik kemm mir-radjazzjoni UVB kif ukoll dik UVA. Ir-radjazzjoni UVB tikkawża l-ħruq tax-xemx u l-qawwa SPF, f'ċifri li jwasslu sa 50, turi l-livell ta' ħarsien. Ir-radjazzjoni UVA twassal għat-tikmix tal-ġilda u tħarbat is-sistema immunitarja. Issa għandu jkun hemm logo tal-UVA li jindika l-protezzjoni meħtieġa tal-UVA, skont metodu ta' evalwazzjoni standard. Termini qarrieqa bħal "ħarsien totali" jew "sun block" se jitneħħew. L-użu tal-prodotti kontra r-raġġi tax-xemx huwa biss wieħed mill-modi kif wieħed jista' jipproteġi ruħu mill-effetti qerrieda tax-xemx..

 

Deskrizzjoni tal-ħarsien	SPF	Logo li jindika l-ħarsien mill-UVA minimu meħtieġ
Baxxa	6
	10
Medja	15
	20
	25
Għolja	30
	50
Għolja ħafna	50+

Il-livelli tal-ożonu

Għandek imnejn tkun interessat li taġġorna ruħek bit-tagħrif dwar il-kundizzjonijiet tal-ożonu madwar l-Ewropa qabel ma tivvjaġġa, partikolarment jekk tbati bl-ażżma jew bi problemi oħra tan-nifs. 

It-tipjip

Attwalment, għadd ta' pajjiżi tal-UE ħadu l-inizjattiva li jimponu restrizzjonijiet jew jipprojbixxu t-tipjip fuq il-postijiet tax-xogħol jew postijiet pubbliċi. L-UE hija ħerqana wkoll li tnaqqas in-numru ta' persuni li jpejpu għal madwar terz tal-popolazzjoni tal-UE. Il-miżuri leġiżlattivi, il-proġetti għall-kontroll tat-tabakk u l-kampanji ta' tagħrif huma s-sinsla tal-politika dwar il-kontroll tat-tabakk.

Il-kampanja HELP tal-UE tappoġġa lil dawk il-persuni li jixtiequ jwaqqfu t-tipjip u tagħti pariri dwar il-periklu tat-tipjip attiv u passiv.