Ta' sikwit l-istampa popolari tippubblika stejjer allarmanti dwar pjanijiet imħejjija mill-"ewrokratiċi mġienen" – per eżempju sabiex ikunu standardizzati d-daqsijiet tal-kondoms jew il-qisien tal-ħwejjeġ tan-nisa jew sabiex tiġi pprojbita l-banana mgħawġa..
Tiftakruha din mid-Daily Express? "L-aħħar regolament mill-UE se jara lin-nisa Britanniċi jespandu sakemm ma jibqgħux jintgħarfu " U l-istorja wara dan kollu? L-istandardizzazzjoni tal-qies tal-ħwejjeġ , ibbażata fuq iċ-ċentimetri flok il-pulzieri. Iżda dan ir-regolament ta' l-UE ma jeżistix – l-istandards Ewropej jissawru permezz ta' ftehim volontarju bejn entitajiet nazzjonali mingħajr il-kontribut ta' Brussell.
Dan huwa eżempju wieħed biss ta' l-hekk imsejjħa Ewro-ħrejjef –informazzjoni falza jew mgħawġa dwar l-UE imxerrda mill-midja. Filwaqt li xi stejjer huma bbażati fuq fatti li ġew interpretati b'mod ħażin jew esaġerat, oħrajn huma sempliċiment ivvintati bħall-istorja ppublikata f'"The Sun" dwar allegazzjonijiet ta' pjanijiet ta' l-UE biex jinbidel l-isem ta' snack Indjan minn "Bombay mix" għal "Mumbai mix" minħabba l-korretezza politika. Kienet maħluqa mill-editur ta' aġenzija ta' l-aħbarijiet li qal "kienet maħsuba li tkun divertenti għat-tablojds".
Ta' spiss l-Ewro-ħrejjef jinħolqu mill-istampa tat-tablojds Britanniċi. Stejjer oħra giddibin jinkludu l-armonizzazzjoni tad-daqs tal-kondoms – li bħal fir-rigward tal-qies tal-ħwejjeġ, l-UE m'għandha x'taqsam xejn mal-ħolqien ta' dawn l-istandards – u l-projbizzjoni tal-banana "mgħawġin b'mod eċċessiv". Għallinqas din l-istorja għandha biċċa verità: il-banana, jekk tinbiegħ taħt il-kategorija "extra class", għandha tkun "ħielsa minn kull malformazzjoni jew tgħawwiġ abnormali". Iżda l-UE qatt ma ppruvat timponi projbizzjoni fuqhom. Huwa importanti wkoll li niftakru li l-industrija u l-konsumaturi jridu l-istandards fuq l-oġġetti u mhux xi għadd ta' "ewrokratiċi mġienen" li jinsabu fi Brussell!
Il-ġurnalisti Britanniċi mhumiex l-uniċi li jipposjedu immaġinazzjoni fertili. Meta l-gazzetta Daniża Søndagsavisen irrappurtat dwar is-sussidju fuq il-pilloli tal-Viagra għall-ewrokratiċi, inħoloq Euromyth ieħor. Il-gazzetta nsiet issemmi li n-nefqa għal Viagra hija koperta biss mill-assigurazzjoni tas-saħħa għall-persunal ta' l-UE li jsofru minn impotenza kkawżata minn mard serju bħal kanċer. Minn eluf ta' membri tal-persunal, għaxra biss qed ikunu mħallsa lura l-ispejjeż għal din il-pillola.
Għalkemm dawn l-istejjer huma divertenti biex jinqraw, għandhom potenzjal perikoluż – li malajr jinxtered fuq l-internet u mezzi ta' komunikazzjoni oħra –-peress li dawn ikomplu jeżistu bħala veritajiet aċċettati fl-opinjoni pubblika u jiffurmaw l-ideat tal-pubbliku dwar l-UE bħala kontrollur li jindaħal xi ftit żejjed.
Iċċara il-fatti tiegħek!
X'taħseb dwar l-EU?