Bħala l-akbar donatur ta' l-għajnuna fid-dinja, il-Kummissjoni ta' l-UE, f'Ġunju adottat Komunikazzjoni biex tesprimi ruħha favur il-kawżi umanitarji, u kkundannat il-vjolazzjonijiet tal-liġi internazzjonali u l-attakki kontra l-ħaddiema li joffru l-għajnuna, filwaqt li tat ħarsa ġenerali lejn il-prinċipji u l-valuri ewlenin li fuqhom jissejjes l-impenn ta' l-UE fir-rigward ta' l-għajnuna umanitarja.
Dawn il-prinċipji u valuri ssaffew wara konsultazzjoni
li damet għaddejja għal sena sħiħa fost l-entitajiet umanitarji (l-NGOs, l-organizzazzjonijiet speċjalizzati u l-aġenziji tan-NU). Din il-konsultazzjoni qajmet kwistjonijiet ewlenin li jaffettwaw l-effiċjenza tal-ħaddiema fil-qasam ta' l-għajnuna umanitarja fit-twettiq ta' dmirijiethom: in-newtralità, l-imparzjalità, ir-rispett lejn il-liġi umanitarja, u l-prinċipji ta' l-għajnuna umanitarja.
Il-pass li jmiss se jkun stqarrija bi sħab
li se tiddikjara l-kunsens fl-UE dwar il-prinċipji u l-aqwa prattiki għall-azzjoni umanitarja. Il-ħsieb wara dan huwa li l-isforzi ta' għajnujna tagħna jsiru effiċjenti kemm jista' jkun u li nirsistu ħalli niksbu metodoloġija aktar koerenti, li permezz tagħha kull min ikun involut – partikolarment, l-UE, il-pajjiżi membri u l-isħab li jimplimentaw il-proġetti - ikun f'pożizzjoni li jikkoopera bla dewmien u b'mod konsistenti.
Fi kliem il-Kummissarju inkarigat mill-iżvilupp, Louis Michel: "Hemm ħafna nies li jeħtieġu desperetament l-għajnuna tagħna fid-Darfur, il-Lvant Nofsani, ix-Sri Lanka u bosta żoni oħra mwiegħra. L-impatt tar-rispons tagħna għad jissaħħaħ jekk naħdmu mill-qrib flimkien fil-livell ta' l-UE sabiex niżguraw aċċess xieraq għaż-żoni fi kriżi."
Stħarriġ li sar dan l-aħħar żvela li disa' minn kull għaxar Ewropej jaqblu li għandu jkun hemm involviment Ewropew fi kwistjonijiet umanitarji. Nofs dawk li pparteċipaw jidhrilhom li l-għajnuna tkun aktar effiċjenti meta titwassal permezz ta' l-UE.
L-uffiċċju għall-għajnuna umanitarja ta' l-UE (l-ECHO ) huwa l-aktar organizzazzjoni li joffri għajnuna umanitarja fid-dinja. Dan iservi xi 18-il miljun persuna fis-sena, f'il fuq minn 60 pajjiż permezz ta' 200 entità li jaħdmu mill-qrib miegħu (NGOs u aġenziji tan-NU). In-nefqa totali tiegħu tisboq is-€700 miljun fis-sena.
Filmati dwar l-għajnuna umanitarja
L-għajnuna umanitarja u l-Unjoni Ewropea (fuljett)
