Il-proġett In-Transit, jiffoka fuq ħajjet iż-żgħażagħ Ewropej permezz ta' film ta' 15-il minuta u websajt interattiva. L-UE tinsab fit-triq it-tajba, u f'liema direzzjoni tinsab għaddejja?
"Iż-żgħażagħ [...] jeħtieġilhom iqumu u jagħżlu d-direzzjoni," qalet Cristina Basto, li għenet fil-koordinament tal-proġett. Il-karattri tal-film huma karikaturi perfetti ta' l-isterjotipi Ewropej: Brittaniku li jqis lill-Ewropa tal-Lvant bħala 'it-tielet dinja", Franċiża supperva, Taljan kemmxejn pastaż jiflirtja ma' tfajla Żvediża ffissata fuq il-moda, Ġermaniż b'karattru monotonu.
Dan il-film qasir, li ntwera għall-ewwel darba f'Marzu fl-okkażjoni tal-50 anniversarju ta' l-UE ġo sala ppakkjata bin-nies fi Brussell, huwa marbut ma' websajt interattiva. Poġġi bil-qiegħda f'vagun virtwali tat-trejn virtwali ta' In-Transit u interaġixxi mal-passiġġieri l-oħra. Meta tikklikkja fuq il-postijiet ta' ħaddieħor tkun tista' tara l-profili tagħhom u tingħaqad f'diskussjoni onlajn.
Il-proġett, li huwa appoġġjat minn assoċjazzjonijiet taż-żgħażagħ fosthom l-AEGEE u l-AIESEC, li huma tnejn mill-akbar entitajiet ta' l-istudenti fid-dinja, u minn għadd ta' personalitajiet fi ħdan il-Parlament Ewropew u l-Kummissjoni, għandu l-għan li jipprovdi pjattaforma għaż-żgħażagħ sabiex dawn jiskambjaw ideathom dwar l-istat attwali ta' l-Ewropa u jkollhom iċ-ċans isemmgħu leħinhom.